web counter
LEXO PA REKLAMA!

SHKARKO APP

App Store
Google Play

E fundit!

x

Zbardhet takimi/ Çfarë diskutoi Knut Fleckenstein me Mesila Dodën

21 Shkurt 2017, 15:49, Aktualitet CNA

Kryetarja e Grupit Parlamentar të PDIU, Mesila Doda, zhvilloi sot një takim me Raporterin për Shqipërinë, Knut Fleckenstein.

Në takimin e zhvilluar u diskutua lidhur me çështjet e reformës zgjedhore, procesin e reformës në drejtësi dhe çështje të tjera të aktualitetit.

Zonja Doda pasi falenderoi raporterin Fleckenstein për mbështetjen e Shqipërisë në procesin e integrimit, e njohu atë me problematikat e sistemit zgjedhor dhe mosrespektimin e kodit zgjedhor nga KQZ në zgjedhjet e kaluara, ku në mënyrë antiligjore u hoq numëruesi nga partia e tretë e koalicionit, vërejtje kjo e pasqyruar dhe në raportin e OSBE ODHIR. Një çështje tjetër themelore është ajo e sistemit zgjedhor në të cilin vërehet një disproporcion mes numurit të votave të marra nga partitë e mesme dhe të vogla dhe numrit të mandateve të përftuara.

Partitë e mëdha dukshëm kanë zgjedhur të përfitojnë nga një formulë zgjedhore ku mandati i një deputeti të partisë së madhe në koalicion përftohet me deri 30% vota më pak se ai i partisë së dytë apo të tretë e më tej në koalicion. Sistemi i kontrollit dypartiak të gjithë procesit të votimit është një praktikë e parregullt dhe në konflikt të hapur interesi, ku gjithë populli voton dhe dy partitë numërojnë duke vendosur të ndajnë plaçkën midis tyre e duke arritur që rreth 300.000 vota nga partitë e vogla të prodhojnë 0 deputetë.

Përsa i përket çështjes së reformës në drejtësi, zonja Doda u shpreh se PDIU ka qenë dhe do të jetë vazhdimisht në mbështetje të reformave. Sot shohim raste kur lirohen apo përgatiten të lirohen nga burgjet kriminelë të njohur dhe kemi dënime publike, por askush nuk thotë që ky është produkt i një sistemi difektoz të drejtësisë që kemi ngritur këto vite.

Raporteri Fleckenstein u shpreh i shqetësuar për situatën dhe vlerësoi problematikat e shfaqura në takim.

Mbështetje ndaj Shqipërisë, e cila u shfaq edhe në rezolutën e miratuar nga Parlamenti Evropian, është përkrahje e qartë për avancimin e reformës në drejtësi dhe progresin në procesin e integrimit./CityNews





Lajmet e fundit nga