Nga Jorida Tabaku/ Përgjumja e Rilindjes dhe fati i të punësuarve në Call Center!

12 Dhjetor 2016, 21:35, Aktualitet CNA

Dy javë më parë Dhoma e Ulët e Parlamentit Italian votoi ligjin e qeverisë Renzi të pagëzuar si ?Ligji kundër delokalizimeve të Call Center?. Një ligj që prek drejtë për drejtë punësimin e 24 mijë shqiptarëve në vend, shumica dërrmuese të rinj që sapo kanë përfunduar shkollën apo edhe punojnë ndërsa shkollohen.

Ligji i sapo miratuar, së pari u hoq mundësinë kompanive italiane që kanë hapur call center përmes të tretëve në Shqipëri që të përfitojnë nga subvencionet e shtetit Italian. Së dyti, kërkon prej tyre që të lajmërojnë qytetarin italian që po lidhet me një operator në Shqipëri duke i dhënë mundësinë të parit të ndryshojë operatorë (pra të zgjedhë një italian) dhe së treti, vështirëson akoma më shumë hapjen e Call Center (në mos rrezikon për disa mbylljen) në vendin tonë.

Të gjitha këto kanë për të sjellë pasoja të menjëhershme të biznesit në vendin tonë duke krijuar një situatë kaotike për të cilën është folur këto ditë në media.

Reagimi i qeverisë? Asgjë konkrete edhe pas miratimit në Senat!

Një vend si Shqipëria duhet të bëjë çdo gjë për të luftuar për çdo vend pune me rajonin, por numri i të papunëve, sipas të dhënave të INSTAT është 14.7% për vitin 2016 duke qenë më i lartë se sa viti 2012 (13.9%).

Këtyre shifrave dhe situatës me ligjin italian në fjalë Ministri i Punës edhe Shanseve të Barabarta si dhe Kryeministri në datën 8 dhjetor 2016 (ditën e rinisë) iu përgjigjën me veprën më të fundit të politikave të fasadës. Ndërtimin e një qendre rinore megjithëse një ditë përpara kësaj date senati italian kishte miratuar ligjin në fjalë. Politikat e tyre në shërbim të rinjve kufizohen në mure të lyera dhe salla të reja ku kryeministri dhe oborri i tij të shpalosin talentin e tyre për fasadat.

Ministria e Ekonomisë që duhet të ketë këtë dhe vetëm këtë detyrë primare, ngriti një grup pune dy ditë përpara se ligji të miratohej ndërkohë që kishte 9 muaj që diskutohej. Ministri i Financave i cili është i pari për të na komentuar shifrat e INSTAT të kryeministrit ka heshtur duke mos ofruar asnjë politikë lehtësuese fiskale apo tentativa për t?u takuar me këto biznese.

Përveç një ?kërcënimi? dhe një letre me tone më së shumti qesharake, qeveria jonë mbeti e përgjumur duke lënë në mëshirë të fatit jo vetëm sipërmarrësit që kanë siguruar vendet e punës por edhe të rinjtë. Minimalisht, kostot me të cilat kompanitë e mëdha do të paguajnë kompanitë e treta (që janë ndërlidhësit me kompanitë e mëdha) do të bien e kjo do të sjellë ulje të punonjësve. Nga ana tjetër, numri i kompanive të reja që do të hapen apo edhe zgjerohen në vend do të bie jashtëzakonisht si pasojë e ligjit të ri dekurajues.

Rilindja sot është e përgjumur dhe dembele për të luftuar për investime të huaja me vendet e rajonit, rilindja sot ka prioritet rritjen e taksave dhe jo krijimin e vendeve të punës, por minimalja do të qe për një qeveri që të paktën të mbajë këto vende pune që janë krijuar, e të ruajë këto të rinj që në moshë të re bëjnë një punë dinjitoze e kanë vendosur të rrinë këtu në Shqipëri. E zënë dhe e nginjur me abuzimet e një mandati, e pështjelluar me sikletet e njëpasnjëshme të skandaleve si dhe dështimeve të turpshme ekonomike, kjo qeveri është e pa zonja edhe mbi të gjitha pa vizion për të ofruar zgjidhje.

Rreziku që të rinjtë e vendit të mbeten pa një burim të ardhurash nuk e shqetëson një qeveri e cila burimin e vet e ka në format e paligjshme. Por na shqetëson ne si opozitë njësoj si shumë shqiptarë, të rinj dhe të vjetër që duan të ndërtojnë të ardhmen e tyre me punë të ndershme.