Meta pret homologen italiane: Italia, avokatja më e fuqishme e Shqipërisë në procesin e integrimit në BE

13 Tetor 2016, 11:28, Aktualitet CNA

Kryetari i Kuvendit të Shqipërisë, Ilir Meta priti në një takim Presidenten e Dhomës së Deputetëve të Italisë, Laura Boldrini. Pasi i uroi mirëseardhjen në vendin tonë znj. Boldrini në këtë vizitë zyrtare, z. Ilir Meta u vlerësoi stadin e shkëlqyer të marrëdhënieve mes dy vendeve dhe veçanërisht atyre parlamentare.

Kryetari i Kuvendit shprehu mirënjohjen për mbështetjen e pakursyer dhe të vazhdueshme që Italia i jep Shqipërisë në kuadër të avancimit të procesit të integrimit evropian.

Meta theksoi se Italia është avokatja më e fuqishme e Shqipërisë në në procesin e integrimit në Bashkimin Evropian dhe shprehu bindjen se dy parlamentet duhet ta intensifikojnë bashkëpunimin e tyre veçanërisht për përafrimin e legjislacionit dhe për rritjen e rolit mbikëqyrës së Kuvendit.

Gjatë takimit Meta dhe Boldrini kanë vlerësuar bashkëpunimin e ngushtë dhe asistencën italiane në luftën kundër krimit të organizuar dhe trafiqeve të paligjshme si edhe kanë ndarë bindjen se dy Parlamentet mbështesin intensifikimin e këtij bashkëpunimi vital mes dy qeverive për të luftuar rrjetet kriminale që përdorin rajonin.

“Është kënaqësi e veçantë t?i uroj edhe një herë mirëseardhjen në vendin tonë në këtë vizitë zyrtare të parë si Presidente e Dhomës së Deputetëve të Parlamentit të Italisë, znj. Laura Boldrini dhe njëkohësisht delegacionit që shoqëron.

Është kënaqësi e veçantë që Kryetarja e Parlamentit viziton vendin tonë, ndërkohë që herën e fundit gati dy dekada më parë ka qenë si misionare në një mision humanitar gjatë përballimit të krizës së Kosovës në vendin tonë. Dua ta falënderoj për të këtë vizitë, e cila rikonfirmon stadin e shkëlqyer të marrëdhënieve tona të gjithanshme, dhe në mënyrë të veçantë atyre parlamentare.

Dëshiroj t?i shpreh edhe një herë mirënjohjen tonë për mbështetjen e pakursyer dhe gjithnjë të veçantë që Italia i jep Shqipërisë lidhur me avancimin e procesit të integrimit evropian.

Italia ka qenë dhe mbetet avokatja më aktive në këtë drejtim dhe ne mbështetemi shumë tek Italia dhe Parlamenti Italian edhe për hapat e ardhshëm, sidomos në drejtim të çeljes së negociatave për anëtarësim.

Sepse Italia ka mbështetur jo vetëm Shqipërinë, por të gjitha vendet e rajonit tonë për axhendën tonë integruese dhe në këtë drejtim kam patur kënaqësinë ta njoh znj. Boldrini me progresin e realizuar në përmbushje të rekomandimeve të Komisionit Evropian, sidomos me arritjen më të rëndësishme atë të miratimit të ndryshimeve kushtetuese me konsensus për reformën në drejtësi.

Ne kemi rënë dakord që dy parlamentet tona dhe në kuadër të përgatitjeve tona për çeljen e negociatave në të ardhmen, të intensifikojnë bashkëpunimin e tyre, në mënyrë që ne të përfitojmë sa shumë nga ekspertiza dhe përvoja italiane për rritjen e kapaciteteve tona, sidomos për përafrimin e legjislacionit, por edhe për rritjen e rolit mbikëqyrës së parlamentit.

Njëkohësisht, kemi vlerësuar bashkëpunimin tonë të shkëlqyer në të gjitha fushat dhe kemi nënvizuar rëndësinë për të thelluar më tej luftën në drejtim të krimit të organizuar, terrorizmit dhe fenomeneve shqetësuese për vendet dhe për rajonin tonë.

Në këtë drejtim kemi shprehur dhe kam shprehur edhe një herë vlerësimin më të madh për rolin e Italisë për të përballuar krizën migratore, por edhe për përkushtimin e veçantë të vetë znj. Boldrini në këtë drejtim, jo vetëm në skenën politike italiane, por edhe në atë evropiane.

Me këtë rast dua të theksoj se kemi diskutuar për të përforcuar bashkëpunimin tonë edhe në kuadër të përgatitjes së Konferencës së Romës vitin e ardhshëm në vijim të Procesit të Berlinit për të nxitur më tej bashkëpunimin midis vendeve të rajonit tonë lidhur me projektet kryesore strategjike të ndërlidhjes rajonale.

Një falënderim të veçantë i bëra znj. Boldrini për angazhimin e saj personal kur u takuam herën e fundit në Romë për heqjen e taksës fikse dhe asaj të qarkullimit, e cila i jep frymëmarrje kompanive shqiptare të transportit që kalojnë përmes Italisë dhe që jam i bindur do të lehtësojnë më tej shkëmbimet tregtare dhe ekonomike në të ardhmen midis dy vendeve tona.

Natyrisht që kemi vlerësuar së bashku komunitetin e jashtëzakonshëm shqiptar në Itali dhe të mirëintegruar atje, por edhe kemi shprehur kënaqësinë që edhe komunitetin italian në Shqipëri po rritet dhe të dyja komunitetet së bashku përbëjnë ura të forta të miqësisë dhe të bashkëpunimit ekonomik, por edhe kulturor. Në mënyrë të veçantë kemi vlerësuar së bashku komunitetin arbëresh në Itali, që ruan gjuhën dhe kulturën arbëreshe, që është një pasuri e rrallë dhe e përbashkët kulturore për të dyja vendet tona prej shekujsh”, u shpreh Meta në fjalën e tij.