Shkodër, Përmet e Lezhë, asgjësohen rreth 23 miëj rrënjë kanabis

11 Gusht 2016, 12:10, Aktualitet CNA

Asgjësohen në Shkodër 9792 bimë të dyshuara Cannabis Sattiva, në sajë të operacionit të koduar “PERTEJ MALIT”. Në këtë aksion të shërbimeve të Komisariatit të Policisë Shkodër morën pjesë edhe Forcat e Ndërhyrjes së Shpejtë. Bimët narkotike u zbuluan në 40 parcela të kultivuara në territorin e fshatrave Shosh dhe Shalë të Dukagjinit, në harkun kohor të dy ditëve, megjithatë nuk është arritur që të kapen apo identifikohen autorët e kultivimit të këtyre bimëve. Bimët narkotike u asgjësuan me anë të djegies.

Në Përmet policia asgjësoi rreth 10 mijë rrënjë kanabis sativa. Nga kontrolli i ushtruar nga Shërbimet e Policisë, për goditjen e veprimtarisë kriminale të kultivimit të bimëve narkotike në Njësinë Administrative Petran, Përmet, në vendin e quajtur “Përroi i Dardhës – Zerec” u konstatuan dhe u asgjësuan në gjashtë parcela të hapura rishtaz 5000 bimë të dyshuara Cannabis Sattiva. Gjithashtu nga kontrolli i ushtruar pranë këtyre parcelave, u gjetën dhe 5000 bimë të dyshuara narkotike të mbjella në kubik plastik. Bimët u asgjësuan në vend me anë të djegies. Policia vijon punën për identifikimin dhe arrestimin e kultivuesve.

Edhe në Lezhë, Mirditë dhe Kurbin u zbuluan 2750 bimë narkotike kanabis sativa. Konkretisht në fshatin Orosh dhe Malaj i Epërm në Mirditë u asgjësuan 2 parcela të kultiviata 1010 bimë. Në fshatin Ungrej Lezhë, u asgjësua 1 parcelë me 780 bimë dhe në Skuraj Kurbin, u asgjësuan 3 parcela me 960 bimë narkotike të kultivuara. Policia vijon punën për identifikimin dhe kapjen e autorëve për veprën penale “Kultivimi i bimëve narkotike” .