A po fiton Edi Rama nga largimi i Ilir Metës?

18 Korrik 2016, 16:16, Aktualitet CNA

Largimi i LSI së drejtuar nga Ilir Meta nga aleanca me Partinë Socialiste duket se po forcon pozitat e Edi Ramës në krye të partisë më të madhe në qeverisjen e vendit. Menjëherë sapo Meta deklaroi daljen nga koalicioni me PS-në dhe u shpreh për krijimin e një Qeverie teknike që do të përgatiste zgjedhjet e parakohshme, duket se rrymat të cilat deri dje tregoheshin kritike ndaj Qeverisë dhe Edi Ramës tashmë kanë ulur tensionet dhe ka një ofrim të tyre.

Kjo situatë sqaron se edhe kritikat apo sulmet që herë pas here Ramës i vinin nga deputetë socialistë kishin të bënin pikërisht me lëshimet që partia Socialiste i bënte LSI-së, apo pushtetit që Meta ngrinte mbi atë të socialistëve.

Gjatë debateve dhe mbledhjeve në Grupin Parlamentar socialist Ilir Meta cilësohej një njeri i krekosur që tërhiqte zvarrë pushtetin e socialistëve.

Akuzat vinin nga fakti se socialistët, të cilët prej vitesh mbështesnin këtë parti, pas 2013 nuk arrinin të siguronin qoftë edhe një vend pune të rëndomtë, ndërsa LSI arrinte të zaptonte institucionet në të gjithë organigramën e tyre.

Ashpërsia me të cilën LSI ka reaguar ndaj administratës në të gjitha institucionet që ka drejtuar, duke larguar njerëz nga puna dhe zëvendësuar ata me anëtarë të saj, ka shkaktuar pakënaqësi jo vetëm tek socialistët, por edhe tek demokratët. Kjo situatë shoqërohej me presionet e socialistëve mjeranë ndaj të zgjedhurve të tyre në Kuvend, të cilët përballë situatave të krijuara, ushtronin presion mbi ministrat dhe Kryeministrin.

Tashmë duket se pushteti i socialistëve është çliruar, po merr frymë me largimin e LSI-së, çka po shoqërohet edhe me uljen e tensioneve dhe ofrimin e të gjitha rrymave më pranë Edi Ramës. Vetëm kjo situatë mund të rikthente në gjirin e PS-së të gjithë deputetët e qejfmbetur apo përjashtuar nga kjo parti, për shkak edhe të përplasjeve të tyre me LSI-në, si në rastin e Tom Doshit.

Ndoshta referuar kësaj që po ndodh në Partinë Socialiste, mund të marrë mësim edhe Lulzim Basha, për të respektuar kundërshtitë që ka brenda PD, qoftë edhe të anëtarësisë së thjeshtë, për një aleancë apo koalicion me LSI-në, e cila përgjatë 4 viteve në qeverisje me demokratët, i bëri të paguajnë koston më të madhe politike që prej themelimit të kësaj partie. /citynews/