Mocioni i mosbesimit/Ja deputetët që mund të mbajnë Ramën Kryeministër

16 Korrik 2016, 15:53, Aktualitet CNA

Kryeministri Edi Rama i ka dhënë si opsion Ilir Metës, në takimin e zhvilluar dje, që LSI mund të largohej nga Qeveria, nëse Kryetari i Kuvendit do e vlerësonte diçka të tillë. Citynews ka raportuar se ky qëndrim i Ramës ka gjetur të papërgatitur Metën, por njëkohësisht tregon se Kryeministri ka të sigurta 71 votat në Kuvend, megjithë problemet e vazhdueshme në Grupin Parlamentar.

Në zgjedhjet e fundit parlamentare, pra ato të 2013, Partia Socialiste siguroi 65 mandate deputetësh, të cilët për shkak të përplasjeve u reduktuan në 55 të tilla. Por largimi i LSI-së, unifikon edhe njëherë Grupin Parlamentar socialist.

Tom Doshi u përjashtua nga PS për shkak të akuzave që hodhin ndaj Ilir Metës, gjë që një largim i LSI nga Qeveria, rikthen Doshin si një mbështetës të Ramës. Eduard Ndocaj, deputeti i PS në Lezhë, ka shfaqur gjithmonë kritika ndaj LSI-së, madje ne 2015 në zgjedhjet vendore, punoi pro kandidatit të PD-së për Bashkinë e Lezhës, vetëm se përballë ti kandidonte një emër nga LSI.

Blushi dhe Hafizi, si deputetë socialistë, pavarësisht divergjencave me Ramën, nuk mund të pranojnë që pushtetin ta marrë PD-LSI apo Basha-Meta, çka do të thotë se minimalisht do të negociojnë me Ramën. Po kështu deputeti i Përmetit, Lad Kosta, pavarësisht kritikave dhe akuzave ndaj Ramës, ndoshta nuk do të votojë kundër një Qeverie të partisë që e ka mandatuar si deputet. Pra largimi i LSI-së, ofron tek Rama deputetë të qejfmbetur apo larguar nga PS pikërisht për shkak të LSI.

Por në anën tjetër, Rama ka nisur negociatat me deputetë të caktuar nga LSI dhe PD, ndërsa PDIU, si parti e koalicionit qeveritar, mund të ketë një marrëveshje të re me poste ministrore, çka do të bënte që minimalisht 4 votat e deputetëve të saj të ishin pro Ramës, pa përfshirë këtu Mesila Dodën.

Në mbështetje të Ramës mund të rreshtohen edhe 3-4 deputetë të LSI-së, për të cilët raportohet se ka pasur negociata nga njerëz të afërt të Ramës. Por nuk është cudi që deputetë që përfaqësojnë partitë e vogla, apo 2 deputetë nga PD-ja të mbështesin një qeveri me Edi Ramën Kryeministër dhe me LSI jashtë qeverisjes. /citynews/