5 arsye pse qendra komerciale 30 katëshe e quajtur "Arena Kombëtare" nuk duhet ndërtuar

23 Prill 2016, 10:57, Aktualitet CNA

“Qytetarët për parkun”, të cilët prej disa muajsh protestojnë kundër betonizimint të Parkut të Liqenit kanë renditur 5 arsye se pse qëndra komerciale 30 katëshe e quajtur “Arena Kombëtare” e cila përfshin edhe një stadium brenda është tërësisht një idiotësi dhe nuk duhet ndërtuar.

1. SHKATËRRIMI I VLERAVE HISTORIKE
Zona në fjale është një zone historike dhe futja e objekteve të tilla ciklopike prish totalisht harmoninë kompozicionale të të gjithë zonës së vjetër dhe është jashtë shkalle me të gjithë objektet përreth. (Siç është kulla shume kateshe tek aneksi, Hotel Sheratoni, dhe objekti 4 katesh tek sheshi Italia).

2. INVESTIM JO FUNKSIONAL
Ky stadium ka filluar të ndërtohet në 1939 dhe është planifikuar me 15,000 vende kur Tirana Kishte 60,000 Banorë. Nderkoh që tani do të zgjerohet në 22,000 vende kur Tirana strehon rreth 1 milion banorë. Qartësisht ky stadium nuk e përmbush funksionin e tij kryesor: atë të një stadiumi qyteti e jo më atë të një stadiumi kombëtar.

3. MBINGARKOHET E GJITHË ZONA
Kur ka aktivitete sportive kombëtare ose ndërkombëtare, fluksi i lëvizjes së njerëzve dhe makinave në zonë është i pamenaxhueshem, pasi zona në të cilën ndodhet stadiumi është një zone urbane dhe ka densitet të lartë popullësie, hapësira të vogla dhe akse të pa mjaftueshme rrugore për te përballuar hyrje daljet e spektatorëve në raste ndeshjesh duke krijuar kolaps në trafik.Zakonisht kjo kategori stadiumesh ndërtohet jashtë zonave të urbanizuara.

4. PRISHJE E RENDIT DHE QETËSISË PUBLIKE
Gjatë aktiviteteve sportive parashikohen brohoritjet të forta të 22,000 Tifozëve që do vendosen përkohësisht aty, kjo përben problem për zonën përreth e cila është kryesisht zone me objekte rezidenciale. Gjithashtu pozicionimi i stadiumit në një zonë të tillë bënë të pamundur menaxhimin e përplasjeve të tifozëve dhe rrezikon rendin dhe sigurinë publike.

5. MUND TË ISHTE MENDUAR NDRYSHE
Stadiumi mund të ishte projektuar diku jashtë Tiranës ku ka hapësira të mëdha të paurbanizuara, ku edhe kapaciteti mund të ishte më i lartë. Ndërkohe stadiumi aktual mund të shërbente për lojëra olimpike, ndeshje lokale e trajnimin e sportisteve të rinj, duke u dhënë të gjithë të rinjve të kryeqytetit disa hapësira sportive të reja.

Qartësisht ky investim po kryhet vetëm që të shiten apartamente, dyqane e zyra dhe ska lidhje fare me një investim në shërbim të qytetareve por është një investim në shërbim të xhepave të personazheve të caktuar.