Pashkët Katolike/ Lulzim Basha uron besimtarët

27 Mars 2016, 11:20, Aktualitet CNA

Kryetari i Partisë Demokratike Lulzim Basha, nëpërmjet një postimi në rrjetet sociale ka uruar sot të gjithë besimtarët katolik për festën e Pashkës.

Kjo ditë është e veçantë për të gjithë besimtarët , sepse për këtë ditë kanë sakrifikuar jetën mijëra klerik shkruan Basha.

Kreu i opozitës e krahason ringjalljen e Krishtit me ringjalljen e besimit të humbur nga shqiptarët në vitet e komunistit.

Postimi i plotë i Lulzim Bashës:

Gëzuar për shumë vjet Pashkët të gjithë besimtarëve katolikë e ungjillorë!

Gëzuar në vecanti besimtarëve të Lezhës. Dua të falenderoj Monsignor Oktavion për këtë meshë kaq të bukur kaq frymëzuese sot, nga Katedralja e Shënkollit.

Dua ti uroj po kështu besimtarët katolikë anembanë Shqipërisë e kudo që jetojnë shqiptarët, vëllezërit dhe motrat tona në këtë ditë të bekuar, që simbolizon ringjalljen e Jezu Krishtit.

Në këtë ditë dua të rikujtoj sakrificën e mijëra klerikëve dhe besimtarëve të Zotit, të krishterë dhe myslimanë, që me sakrificën e tyre, me besimin e patundur në Zot dhanë gjithcka, flijuan dhe jetët e tyre në shkretëtirën e shpirtit dhe terrorit komunist, që shkatërroi dhe mbylli mijëra kisha dhe xhamia anembanë Shqipërisë, në një përpjekje cnjerëzore për të vrarë dhe mbytur besimin në Zot; ti falenderoj që mbajtën të gjallë shpresën dhe besimin në Zot dhe ringjallën kishën katolike, kishën ortodokse, xhamiat dhe teqetë anembanë Shqipërisë; ringjallën besimin në Zot 25 vite më parë, duke bërë të mundur që shqiptarët sot në liri ti gëzohen e ti falen Zotit të bashkuar në shpresë dhe besim se e nesërmja do të jetë më e mirë.

Dhe më këtë shpresë dhe besim që vjen përmes ringjalljes që Pashka kremton, dua ti drejtohem sot në vecanti të papunëve, të rinjve, atyre që kanë hedhur sytë e dëshpërimit nga emigracioni, të sëmurëve dhe familjarëve të tyre e t?ju them: kini shpresë, kini besim!

Kjo ditë e ringjalljes së shpresës le të shërbejë për të na bashkuar të gjithëve në vlerat themelore që e bëjnë një shoqëri të fortë e të përparuar, besimi në Zot, besimi në Atdhe, besimi në familje, besimi tek njëri-tjetri.
Pacim bekimin e Zotit në këtë ditë të bekuar!
Zoti e bekoftë Shqipërinë!