Skandal me Check-Up/ KLSH zbulon 360 milion shpërdorim nga Beqaj

27 Shkurt 2016, 07:35, Aktualitet CNA

Kontrolli i Lartë i Shtetit ka zbuluar abuzime dhe shkelje të tjera rreth koncesionit të kontrollit shëndetësor parësor falas për grupmoshën 40-65 vjeç, i njohur si Check-Up. Në një raport voluminoz për të gjitha shkeljet në shëndetësi, KLSH ka konstatuar se ministri Ilir Beqaj ka urdhëruar trajnimin e mjekëve, ndërkohë që shërbimi parësor u dha me koncesion. Sipas KLSH-së, janë shtuar plot 360 milionë lekë për trajnim mjekësh, ndërkohë që ky shërbim pas pak muajsh i kaloi kompanisë private, me aksionere kryesore Vilma Nushin.

Raporti bën fjalë për periudhën 01.01.2014-31.12.2014 dhe është dorëzuar në prokurori, pasi KLSH ka kallëzuar penalisht disa zyrtarë për abuzime, kryesisht me rimbursimin e barnave. Në raport është evidentuar se ministri i Shëndetësisë ka kërkuar shtesë fondi me qëllim trajnimin e mjekëve të kujdesit shëndetësor parësor, teksa vendimi është marrë pa u mbledhur Këshilli Administrativ, ndërkohë që ky shërbim nga krahu tjetër i është dhënë me koncesion një kompanie private. Shkresat e ministrit janë lëshuar në muajin shtator 2014, ndërkohë që në muajin tetor ishte hapur tenderi për koncesionin e Check- Up dhe u mbyll më 11.09.2014. Sipas KLSH ky veprim ka dëmtuar financiarisht FSDKSH.

?Referuar shkresave të ministrit rezulton se: ky proces është në fazën e II e ?Projektit për zhvillimin profesional?, proces i cili është realizuar në bashkëpunim me Agjencinë Zbatuese të Projektit, PDS2, në kuadër të Marrëveshjes së Këshillit të Ministrave të Republikës së Shqipërisë dhe Qeverisë së Konfederatës Zviceriane, ku janë përfshirë trajnime të stafit mjek dhe infermier, por dhe trajnime të personelit në lidhje me përdorimin e kompjuterit, etj. Ndërsa me shkresën nr. 5534, datë 22.09.2014, të Drejtorit të Përgjithshëm të Kujdesit Shëndetësor në MSH, Gazmend Bejtja është dërguar një vlerësim financiar paraprak i projektit duke ju referuar projektit të hartuar nga koordinatori i PIU. Përdorimi i këtyre fondeve pa vendimmarrje të KA, ndërkohë që ky shërbim i është dhënë subjektit privat me koncesion, ka rënduar padrejtësisht shpenzimet dhe rezultatin e Fondit?, është shprehur KLSH./ Sot