Avokati i Popullit, apel qeverisë që të përgatitet për valën e refugjatëve

26 Shkurt 2016, 20:15, Aktualitet CNA

Avokati i Popullit, Igli Totozani u bëri thirrje të premten autoriteteve shqiptare që të marrin masa për pritjen dhe garantimin e të drejtave të refugjatëve, nëse rrugëtimi i tyre drejt Bashkimit Europian do të kalojë përmes Shqipërisë.

Në një njoftim për mediat, Totozani tha se po ndjek me vëmendje të veçantë situatën e krijuar me emigrantët e Lindjes së Mesme në territorin grek, ndërsa e cilësoi këtë ?një moment ku shoqëritë dhe individët vihen në provë për ndjenjat e tyre të solidaritetit dhe humanizmit?.

Avokati i Popullit e konsideroi të domosdoshme që qeveria shqiptare të shtojë përpjekjet informuese, për të mos lejuar shfaqjen e stereotipeve, akteve diskriminuese apo ksenofobe ndaj një vale të pritshme emigrantësh.

?Policia e Shtetit duhet të realizojë rolin e saj si mbrojtëse dhe garantuese e sigurisë dhe të drejtave të njeriut, në rastin e një fluksi migrator përmes Shqipërisë,? tha Totozani.

?Në këtë kontekst, strukturave të Policisë së Shtetit i lind përgjegjësia që të pengojnë dhe godasin çdo tentativë për trafikim të qenieve njerëzore,? shtoi ai.

Përgjatë vitit 2015, dhjetra mijëra refugjatë sirianë kaluan nga Greqia drejt korridorit ballkanik për të mbërritur në vendet e Bashkimit Europian. Për shkak të pozicionit të saj gjeografik, Shqipëria nuk ka qenë deri më tani pjesë e këtij korridori.

Por pas mbylljes së kufirit mes Greqisë dhe Maqedonisë, mediat ndërkombëtare paralajmërojnë se së shpejti refugjatët do të zbarkojnë në kufirin shqiptar. Qeveria shqiptare ka promovuar në të shkuarën pranimin e refugjatëve, por deklarimet e saj të fundit kanë qenë kontradiktore.

Ministrja e Integrimit, Klajda Gjosha tha dy ditë më parë se Shqipëria nuk do të ngrejë mure për emigrantët, duke konfirmuar se vendi ka marrë masa për pritjen e një fuksi të madh në ditët e ardhshme.

Të enjten, kryeministri Edi Rama hodhi poshtë mundësinë e hapjes së kufirit, duke deklaruar se Shqipëria nuk i ka as kushtet dhe as fuqinë për t?i pranuar të gjithë.

? ?ishim të disponueshëm, nëse do të kishte një ndarje proporcionale të refugjatëve. Madje Maqedonia dhe Serbia kanë qenë më të gatshme, sesa shumë vende të tjera europiane. Ne nuk mund të jemi të gatshëm t?i presim të gjithë, nëse nuk marrin edhe të tjerët,? tha Rama./BIRN