Beqaj - Kolker: Zgjerim i bashkëpunimit të partneritetit strategjik SHBA-Shqipëri

24 Shkurt 2016, 08:41, Politikë CNA

Ministri i Shëndetësisë, Ilir Beqaj ndodhet për një vizitë pune në SHBA, ku ka takuar me Ambasadorin Jimmy Kolker, Asistent Sekretari i Dept. të SHBA për Shëndetin dhe Shërbime Njerëzore.

Në kuadrin e vizitës së punës në SHBA, Ministri i Shëndetësisë, z. Ilir Beqaj, u prit dje (23/02/2016) në një takim zyrtar nga Asistent Sekretari i Departamentit të SHBA për Shëndetin dhe Shërbimet Njerëzore, Ambasadori Jimmy Kolker dhe z. Peter Schmeissner, Drejtor për Europën dhe Eurazinë.

Në takim, ku ishin të pranishëm edhe Nënkryetarja e Komisionit për Punën Çështjet Sociale dhe Shëndetësinë, Deputetja e PS-së, Dr. Klodiana Spahiu, si dhe Ambasadorja e Shqipërisë në Uashington, znj. Floreta Luli-Faber, bashkëbiseduesit diskutuan për forcimin dhe zgjerimin e mëtejshëm të bashkëpunimit dypalësh në fushën e kujdesit shëndetësor, në kuadrin e partneritetit strategjik të nënshkruar vjet ndërmjet dy qeverive.

Pasi bëri një përshkrim të situatës së kujdesit shëndetësor në vend, Ministri Beqaj solli në vëmendjen e zyrtarit të lartë të amerikan të shëndetësisë një vlerësim të sfidave me të cilat përballet sistemi shqiptar i kujdesit shëndetësor, si dhe një pasqyrë të programeve që po zbatohen në përmbushje të Programit të Qeverisë për vendosjen në vend të sistemit të kujdesit shëndetësor me Mbulim Universal.

Gjithashtu, në takim u diskutua midis të tjerash, për uljen e çmimit të barnave, edhe nën dritën e zhvillimeve më të fundit në SHBA me situatën e çmimeve të barnave.

Ndërkohë, nga ana e tij, Ambasadori Kolker e siguroi kreun e shëndetësisë shqiptare për mbështetje përsa i përket forcimit të kapaciteteve shqiptare në përgjigjen ndaj rreziqeve dhe kërcënimeve të ndryshme epidemiolojike, forcimit të kapaciteteve të spitalit infektiv, si dhe përgjigjes së urgjencës mjekësore në rastet e përhapjes së infeksioneve epidemike.

Ministri Beqaj, i shoqëruar nga një ekip drejtuesish të lartë të shëndetësisë, vijon takimet me drejtues dhe përfaqësues të sistemit të kujdesit shëndetësor dhe në kuadrin e vizitës së punës që po kryen në Shtetet e Bashkuara të Amerikës.