Fillimi i Blushit, fundi i Ramës

28 Janar 2016, 11:04, Aktualitet CNA

Elvi Fundo

Ben Blushi pritet nga sot të jetë publikisht në garën për kreun e Partisë Socialiste. Në gati 7 vjet, në PS nuk janë zhvilluar zgjedhjet. Ajo e fundit ishte një përballje qesharake midis Edi Ramës dhe Maqo Lakrorit, pas tërheqjes nga gara të kandidatëve të tjerë.

Një kongres socialist që vjen në kolendrat greke, i kërkuar me ngulm nga Ben Blushi që ditën e parë të mbarimit të afatit statutor, por në fund kongresi erdhi në një datë e cila në fakt nuk u vendos nga kryesia e Partisë Socialiste, por nga super deputeti Koço Kokëdhima.

Fillimisht, kongresi u vendos në datën 29 janar. I vetmi që kërkoi shtyrjen ishte Kokëdhima dhe sot kemi një kongres në datën 9 maj, dhe një Ben Blushi që ka 40 ditë kohë të jetë pjesë e një gare të pabarabartë.

Kjo është një garë e pabarabartë për disa detaje të raportuara nga vetë socialistë, nga jugu në veri, në shumë nga organizata socialiste, nuk janë zhvilluar fare zgjedhjet, në të tjera drejtuesit janë emëruar, diku është bërë pazar, diku deputetët kanë komanduar njerëzit e tyre besnik. Por kjo është pak për pabarazinë e kësaj gare.

Nuk mjaftojnë këto veprime, por garës i ndryshohen rregullat. Mbështetësit e Edi Ramës duan një kongres, një sallë të mbyllur ku kryeministri do shpalosë ?sukseset? e Rilindjes, ndërkohë Blushi do deklarojë vdekjen e Rilindjes dhe do kërkojë kthimin e pushtetit tek socialistët.

A mund të ketë frikë, kryeministri i një vendi që pretendon se është votuar nga 1 milionë vota, nga trupa elektorale e partisë që ai drejton?

Rama ka frikë nga anëtarësia e PS dhe votimin nga 1 anëtar 1 votë e çon tek delegatët që në fakt janë përfituesit e pushtetit të rilindjes, kurse socialistët e vërtetë janë humbësit e saj, prandaj ata nuk lejohet të votojnë.

Një kongres, ku për herë të parë pas 7 vitesh, e gjithë salla duhet të jetë e mbushur me drejtorë, ministra e zv/ ministra, përgjegjës apo shefa sektorësh, deputetë apo sekserët e tyre që fatkeqësisht do jenë shumica e këtij kongresi, të gjithë të emëruar nga Edi Rama. Piramida e servilave nga poshtë lart është fytyra që do kemi në këtë kongres, ku zgjedhjet i ka drejtuar Rama, njerëzit i ka emëruar Rama, në garë për tu rizgjedhur si kryetar është Edi Rama, voton Edi Rama.

Ben Blushi garon me rregulla të ndryshuara në mes të garës.

Ai shkon në këtë garë me imazhin e deputetit kritik ndaj qeverisë së partisë së tij. Kritik me argumente të forta për papunësinë, varfërinë, shkëputjen nga baza e socialistëve, drejtimin e partisë me dorë të hekurt, mungesën e debatit dhe një vizion të zymtë për forcën më të madhe politike në vend, por edhe kritik ndaj aleatit që po gërryen PS-në.

Ben Blushi në fakt, me kandidimin e tij, me çfarëdo lloj rezultati, ka firmosur fillimin e tij dhe fundin e Edi Ramës. Ky kongres, ato rregulla loje, situata ekonomiko-politike e vendit, qëndrimet e tij publike janë avantazhi i Ben Blushit dhe garancia për një ngritje të fortë politike. Në një përballje krejtësisht të pabarabartë në forume, por të fituar nga Blushi në bazën e vërtetë socialiste dhe në opinion publik.

Kjo garë, tashmë nuk ka asnjë dyshim që do sjellë fundin e Edi Ramës dhe fillimin e Ben Blushit./citynews