Ministrat dhe deputetët listë me socialistët e papunë/ Ja skema e re për punësimin e të pakënaqurve

10 Nëntor 2015, 07:44, Aktualitet CNA

Kryeministri Edi Rama ka shtuar presionin mbi ministrat, gjashtë koordinatorët, anëtarët e forumeve të larta dhe deputetët socialistë për zbutjen e pakënaqësive në bazën e Partisë Socialiste, nëpërmjet komunikimit intensiv, kontakteve dhe adresimit të kërkesave dhe ?halleve? të tyre, me qëllim maksimalizimin e rezultatit në zgjedhjet e ardhshme parlamentare dhe rikuperimit të shembjes në zgjedhjet e fundit lokale, ku PS humbi rrugës 300 mijë vota. Përpos prezantimit të reformave të ndërmarra, aksioneve që do të ndërmerren në ditët në vijim, mbikëqyrjes së procesit zgjedhor dhe riorganizimit të partisë, një nga detyrat kryesore të zbarkimit të ministrave dhe deputetëve në bazë është identifikimi dhe adresimi i të gjitha shqetësimeve dhe kërkesave të socialistëve, për të rifituar besimin dhe mbështetjen e tyre. Pavarësisht se kryeministri Rama, nga Korça, tha spublikisht që socialistët të mos ankoheshin se ishin pa punë, pasi sipas tij, të gjithë janë në punë, shefi i qeverisë është seriozisht i shqetësuar nga masat e socialistëve të papunë dhe të mënjanuar nga pushteti i tij dyvjeçar. Shqetësimin, shefi i qeverisë e ka shprehur në të gjithë takimet e fundit me grupet e punës, deputetët dhe koordinatorët, ndërsa gjatë konsultave me bashkëpunëtorët më të ngushtë ka dhënë edhe disa udhëzime përkatëse.

Në këtë kuadër, sipas burimeve, krahas verifikimit të të gjitha emërimeve në dy vitet e fundit dhe rishqyrtimit të të gjithë pozicioneve që mbajnë sot në administratë njerëzit e Partisë Demokratike, do të hartohet një listë e re, me të gjithë simpatizantët dhe kontribuuesit e Partisë Socialiste, të lënë jashtë vëmendjes gjatë dy viteve të fundit. Teksa sëmundja e nepotizmit, klientelizimit dhe falsitetit të konkurseve kanë prekur frikshëm administratën publike, kryeministri Rama ka kthyer sytë tek baza e Partisë Socialiste, me sa duket nën ndikimin dhe i shtyrë nga mesazhi që mori në zgjedhjet e fundit lokale. Anëtarët e kabinetit qeveritar, drejtorët, deputetët dhe përfaqësuesit e PS në nivel lokal, krahas rifreskimit dhe zgjerimit të listës së anëtarësisë së PS, pritet të bëjnë edhe lista për çdo zonë përkatëse, me socialistët e papunë. Sipas burimeve, lista, përpos gjeneraliteteve, do të përmbajë arsimin përkatës, kohën e kontributit, të kaluarën etj.

Lista me socialistët e papunë

Lista me mbështetësit e papunë të Partisë Socialiste do të jetë referencë për ministritë, degët e tyre, drejtoritë e rëndësishme dhe agjencitë e ndryshme shtetërore. Ndërkaq, lista në fjalë, e cila do të marrë formë përfundimtare gjatë ditëve në vijim, do të jetë referencë edhe për kryetarët socialistë të njësive vendore, për pozicionet vakante që do të hapen gjatë ndryshimit të strukturave të bashkive, zbatimit të projekteve të ndryshme etj. Sipas burimeve, kreu i qeverisë u ka kërkuar bashkëpunëtorëve të tregojnë kujdes në procesin e emërimeve, duke theksuar domosdoshmërinë se në çdo vend vakant pune, të çohen njerëzit me arsim përkatës. /Sot