E fundit!

10:01 Kronika

Armë, kokainë dhe kanabis në zonat bregdetare/ Arrestohen dy persona

Policia e Vlorës ka finalizuar operacionin e koduar “Sigur...

Koncert ne vitin 1936 i luajtur më 2015 !

8 Nëntor 2015, 09:02, Opinione CNA

Nga Artan Fuga

Ai mbledh në një mejhane disa karagjoza estrade, i paguan, ose edhe nuk i paguan, por u jep premtimin se do t’i paguajë për një shfaqje klounash që do të bëhet ay nga shekulli tjetër.

Lekët u ka marrë disa fakirave jetimë, që i ka gënjyer duke u thënë se ajrin që thithin duhet ta blejnë te dyqanet e tij, aty nga lagja amorale “Brraka e Shigjetosur”.

Në mejhane askush nuk e di që ata që rrinë pas banaqeve janë klouna të paguar.

Kapter Shazivarrrri mban fjalimin e rastit, në gjendje të dehur.

Unë thotë jam me Zogollin, por votoj Fan Nolin, por shpirtin e kam te Ismail Qemali i Ri.

Shazivarrrrrrr !
Varrrrri lesht !
Vetëm varrri ta ndreq vesin !

Klounat e stradës me sy të zgurdualluar nga lakmia dhe uria mendojnë në vetmi :

A do të na japi ndonjë kacidhe nga lekët e grabitura ky maskarai i dreqit apo jo?

Asqerët e Shazivarrrrrrit ulurasin si bujarë që janë :

Rroftë z. Shazivarr,

mecenati ynë,
mbrojtësi i arteve dhe i sporteve,
miku i putanave dhe i horrave,
lëpirësi më i madh i prapanicave që ulen në kolltuqe, administratori i universit qielloorrrrrr,

Rrofshin udhët qorre !
Hajde bileta për autobuza për Rrugicën e Tretë Qorre !

Rroftë Maestro Gjeneral Magazinier Shazivarri!

Shazivarri sheh nga kamarieri dhe i bërtet :

Mbushjaju edhe një!

Dhe modest sqaron : Që këtej e tutje nuk jam më gjeneral, do të shpallem kryemagazinier i rrugëve qiellore, do të merrem me art, letërsi, përkthime, sporte, do të bëhem mbrojtësi i artistëve.

Rroooofsh gjeneral !

– bërtasin klounat duke tundur në duar spaletat e fabrikuara te fasonët, fallco, të
gjeneralit të qenefeve,
mbrojtësit të ahengjeve,
paguesit të daullexhinjve të lagjes sonë “Morrat e Zgjebosur” të amoraliberalizmit.

Qyteti mban frymën dhe sheh duke gromësitur dhe nxjerrë gazra të ndyrë nga poshtë koncertin në vitin 1936…ne versionin e ketij mijevjecari te ri…