Kodheli përgatit bazat ushtarake për 100 mijë refugjatë/ Italianët të shqetësuar për rikthimin e skafeve

5 Nëntor 2015, 09:32, Aktualitet CNA

Mbi 100 mijë refugjatë, të cilët ikin nga lufta në Siri, pritet të mësyjnë Shqipërinë dhe Ballkanin. Mwsohet se Ministria e Mbrojtjes po përgatit bazat ushtarake në shumë qytete të vendit për strehimin e dhjetëra e mijëra refugjatëve.

Përgatitjet kanë ardhur pas takimeve që kryeministri Edi Rama zhvilloi në Bruksel me një sërë personalitetesh dhe eurodeputetë, gjatë vizitës së tij në Belgjikë më 26 tetor. Lajmi është bërë i ditur nga mediat italiane, të cilat janë shprehur se me ardhjen e dimrit, mund të ndodhë që refugjatët të kalojnë nga Shqipëria, ndërsa i tremben faktit se vendi ynë mund të shërbejë si rrugë kalimi drejt Italisë.

?Një ish-bazë ushtarake në qytetin e Bilishtit, në Jug të vendit dhe pranë kufirit grek, është e gatshme për të mirëpritur rreth 500 refugjatë. Baza të tjera të braktisura ushtarake janë gjithashtu duke u përgatitur për një dyndje të mundshme të refugjatëve nga Greqia?, është shprehur portali ?Italintermedia?, në një shkrim kushtuar pritjes së refugjatëve nga Shqipëria. Në këtë portal është theksuar gjithashtu se, Bashkimi Evropian ka kërkuar që Shqipëria, Greqia dhe Maqedonia të nisin përgatitjet për një menaxhim të mirë të kufijve.

?Refugjatët nga Lindja e Mesme, që vazhdojnë të kalojnë në Evropën Qendrore, mund të fillojnë të përdorin rrugët e vjetra nga Shqipëria në Itali, ashtu si ata dhjetëra mijëra shqiptarë pas rënies së regjimit komunist. Shqipëria është e gatshme të bëjë pjesën e saj në planin e Bashkimit Evropian për të akomoduar 100.000 refugjatë në Ballkan, por Tirana është gjithashtu e shqetësuar se vendi mund të përdoret si bazë për të ndjekur një rrugë të re për në brigjet italiane dhe pjesës tjetër të Bashkimi Evropian?, është theksuar më tej.

Frika e Italisë

Autoritetet italiane kanë dhënë alarmin se gjatë ditëve në vijim mund të ripërsëritet viti 1991 dhe 1997, kur me mijëra shqiptarë përdorën skafet dhe anijet për të shkuar në brigjet italiane. Sipas portalit, ka shumë rrezik që të rinisë trafiku i refugjatëve, njësoj siç ndodhi pas rënies së komunizmit në Shqipëri, apo gjatë trazirave të vitit 1997. ?Që kur Hungaria ka mbyllur kufijtë e saj, refugjatët kanë kërkuar rrugë alternative duke u zhvendosur gjithnjë e më shumë në Veri dhe kanali i Otrantos midis Shqipërisë dhe Italisë, i cili në një minimum largësie midis dy shteteve arrin vetëm 72 kilometra, tërhoqi vëmendjen ndërkombëtare në vitin 1991, kur dhjetëra mijëra shqiptarë e kaluan duke u larguar nga vendi pas rënies së regjimit komunist dhe më pas në vitin 1997, kur vendi u godit nga trazirat civile?, janë shprehur mediat italiane.