Nishani: Mazhoranca ka goditur 3 shtyllat ekzistenciale të shtetit

30 Shtator 2015, 19:48, Aktualitet CNA

Presidenti Bujar Nishani ka akuzuar mazhorancën, se ka dogitur tre shtyllat ekzistenciale të shtetit, ku Presidenti luan një rol balancues.

I ftuar në ?Tonight Ilva Tare?, Nishani tha se këto 3 çështje të rëndësishme janë sistemi i drejtësisë, çështjet e sigurisë dhe politikës së jashtme.

“Në çështjet e marrëveshjeve politike dhe zgjidhjeve politike kur ato kërkohen janë palët politike të cilat duhet të orientojnë zgjidhjen politike duhet të jenë pjesë e saj. Por Presidenti mund të jetë i nevojshëm në një moment të caktuar që duke ushtruar kompetencat e tij padyshim që mund të krijojë lehtësirat e nevojshme që çdo situatë e një ngërçi politik të mos shkarkojë tek jeta institucionale, funksioni i shtetit dhe qytetarët. Ndaj është paraparë dhe në Kushtetutë funksioni i Presidentit si balancues i pushteteve dhe institucioneve. Ka një dozë shqetësimi sa i takon mënyrës së sjelljes së qeverisë ndaj institucionit të Presidentit dhe jo vetëm në çështjen e drejtësisë.Po të shikosh çështjet e politikës së jashtme, sigurisë dhe drejtësisë që janë tre kolonat e një shteti ku Kushtetuta dhe kushtetutbërësit i kanë dhënë Presidentit për të luajtur këtë rol balancues, sjelljet e dy viteve të fundit të mazhorancës duke i hequr kompetencat Presidentit si komandant i përgjithshëm i Forcave të Armatosura dhe duke ja reduktuar një pjesë të tyre kanë dëmtuar njërën prej kolonave që lidhet me çështjet e sigurisë kombëtare.Pjesën tjetër të sistemit të drejtësisë, nuk ka të bëjë fare me kreun e KLD, Presidenti ka vetëm një kompetencë formale që është ajo e organizimit dhe drejtimit të mbledhjes. Në çështjet të rëndësishme të KLD Presidenti nuk ka të drejtë vote fare.Presidenti ka rol balancues kur vjen puna tek procesi i emërimit të gjyqtarëve ne gjykatën e lartë dhe Kushtetuese të cilët emërohen nga Presidenti dhe miratohen nga Kuvendi.Ka dy vjet që të gjitha dekretet e Presidentit për emërimin e anëtarëve të gjykatës së lartë janë rrëzuar pa asnjë justifikim, argument dhe referencë ligjore nga Kuvendi. Edhe kjo shtyllë është goditur dhe rrëzuar. Kishte mbetur deri tani shtylla e tretë, e politikës së jashtme, ku kreu i shtetit përfaqëson politikën e jashtme të Shqipërisë.Rasti më i fundit dhe në vijimësi procedura e emërimit të Ambasadorëve.Sjellja më e fundit duke e larguar një Ambasador nga pozicioni i tij pa dekret të Presidentit ka goditur dhe shtyllën e tretë të ekzistencës dhe funksionimit të shtetit.”