web counter
LEXO PA REKLAMA!

SHKARKO APP

App Store
Google Play

Apeli i Shoqatës së Fëmijëve me Diabet: Kërkojmë të na rimbursohen pajisjet për kurën e diabetit

29 Shtator 2015, 14:21, Aktualitet CNA

Shoqata e Fëmijëve dhe të Rinjve me Diabet ka zgjedhur të protestojë lidhur me mos rimbursimin e pajisjeve mjekësore për diabetikët në faqen e saj në Facebook. Në një nga statuset, ajo nënvizon indiferencën e politikbërësve dhe del në përfundimin se vetëm po të prekeshin personalisht, situata ndoshta do të ndryshonte. “Ne nuk urojmë këtë fatkeqësi fëmijëve të politikanëve, por kërkojmë zgjidhje të problemit në lidhje me rimbursimin e fishave të glicemisë dhe materialeve të tjera mjekësore”, shkruhet në fund të postimit.

Diabetikët në Shqipëri janë ndër kategoritë që e ndjejnë më shumë se kushdo mungesën e rimbursimit të pajisjeve mjekësore, aspekt që peshon veçanërisht te fëmijët dhe adoleshentët e prekur. Muaj më parë kreu i shoqatës së këtij komuniteti, Asim Toro, i kërkoi qeverisë që bashkë me barnat të rimbursonte një pjesë të pajisjeve të cilat kanë një kosto të lartë për pacientët me diabet. Të tilla janë aget, fishat, protezat, pompat e insulinës, glukagoni, shumë prej të cilave ata i blejnë çdo muaj. Ndonëse FSDKSH premtoi që do t’i rimbursonte përgjatë 2015-ës, situata e diabetikëve nuk ka ndryshuar dhe ata vazhdojnë të përballen jo vetëm me koston e lartë por edhe me mungesa, si në rastin e glukagonit që në shtetet e tjera rimbursohet nga shteti, ndërkohë në Shqipëri vazhdon të jetë në mungesë. Dhe apelet nga shoqata nuk rreshtin: “Komisioni Teknik i Barnave të Rimbursueshme dhe Pajisjeve Mjekësore kur do marrë një vendim për rimbursimin e fishave ageve për komuniterin me diabet???”.

Dita Botërore e Diabetit shënohet më 14 nëntor 2015 dhe aktivitete informimi, edukimi e sensibilizimi do të zhvillohen si çdo vit edhe në Shqipëri, por kaq nuk mjafton krahasuar me nevojat reale të diabetikëve. Janë jo të rralla rastet kur fëmijët dhe të rinjtë nuk sigurojnë dot fishat e glicemisë për të matur sheqerin në gjak minimalisht 3 herë në ditë dhe rrezikojnë komën diabetike./ Dorina Gjuzi





Lajmet e fundit nga