web counter
LEXO PA REKLAMA!

SHKARKO APP

App Store
Google Play

Dyfishohen pozicionet vakante në administratën publike

2 Shtator 2015, 07:15, Aktualitet CNA

Dyfishohet numri i vendeve vakante në piramidën e administratës publike. Në mesin e mandatit qeverisës si dhe dy muaj pas mesazhit të fortë që mori në zgjedhjet e 21 Qershorit, mazhoranca qeverisëse ka vendosur të hapë dyert e administratës publike. As në javët dhe muajt e parë pas ndryshimit të pushtetit nuk janë shpallur një numër kaq i madh vendesh në administratën publike.

Në një kohë kur kryeministri Edi Rama ka nisur një tur takimesh me deputetë të Partisë Socialiste sipas qarqeve si dhe me përfaqësues të pushtetit vendor, Departamenti i Administratës Publike, degë e rëndësishme e qeverisë, ka shpallur me dhjetëra vende të reja vakante në administratë. Kjo lëvizje është diktuar nga presioni i madh i bazës socialiste si dhe i deputetëve socialistë, të cilët pothuajse në çdo takim me kryeministrin Edi Rama, kanë shprehur shqetësimin për mijëra socialistë që kanë mbetur rrugëve. Edhe në takimet e fundit të kryeministrit Edi Rama me deputetët dhe përfaqësuesit vendorë, çështja e punësimit të simpatizantëve ka dominuar diskutimet. Fillimisht, kryeministri Edi Rama u kërkoi deputetëve dhe ministrave të lëviznin dhe lobonin jashtë vendit, për të tërhequr investime në Shqipëri, me qëllim hapjen e vendeve të punës. Por, kjo ishte thjesht një ëndërr ashtu si shumë të tjera, pasi administrata mbetet qëllimi dhe pikësynimi i panegociueshëm i militantëve për t?u punësuar. Ndërkaq, pa nisur ende shtatori, në prapaskenë po zhvillohet një luftë e ashpër për vende pune në administratë. Shpallja e dhjetëra vendeve vakante nga Departamenti i Administratës Publike i ka intensifikuar ndërhyrjet, lëvizjet, përpjekjet dhe lobimet. Bëhet fjalë për qindra vende të lira pune në ministri, drejtori dhe institucione të ndryshme në kryeqytet dhe në rrethe. Sa i përket aplikimeve për personat e interesuar, ato bëhen online në faqen e Departamentit të Administratës Publike. Ndërsa më pas fituesit duhet t?i nënshtrohen konkurseve.





Lajmet e fundit nga