E fundit!

10:35 Live Updates

Hijet e Erion Veliajt në protestë

Veliaj përmes Arta Dades refuzon “antimiti...

Jorida Tabaku: AKTI NORMATIV THELLON KRIZËN, VETËM ALTERNATIVA E PD ZGJIDHJE PËR EKONOMINË

7 Gusht 2015, 10:59, Politikë CNA

Politikat e mbrapshta fiskale dhe ekonomike, të nisura këtu e dy vjet më parë sollën si pasojë dështimin e plotë të parashikimit qeveritar, të një buxheti të trumbetuar 11 muaj më parë si një buxhet historik që do ta çonte ekonominë në fund të mandatit të parë rilindës me një rritje prej 4%.

Në gjashtë muaj të këtij viti, rritja e taskave, një administratë e korruptuar e cila përdor kërbaçin si kërcënim dhe agjencitë qeveritare si dogana edhe tatimet që dështojnë nga muaji në muaj në realizimet e tyre, i kanë sjellë arkës së shtetit 13.4 miliardë lekë më pak të ardhura. Megjithëse, ky ka qenë viti i dytë në radhë, në të cilin qeveria ka rritur taksa që ndikojnë drejtë për drejtë në xhepin e konsumatorëve dhe në ciklin ekonomik të vendit, ku një sërë taksash si tatimi mbi fitimin, dividendin, qeraja, tatimi mbi të ardhurat personale u rritën me 50%, taksa e qarkullimit me 240 lekë etj.

Me paturpësinë më të madhe, kryeministri i vendit për dy orë me radhë paraqiti fakte që flisnin për një rritje ekonomike të vendit, kur pak kohë më parë në fshehtësi të plotë kishte miratuar Aktin Normativ të radhës. Përmes të cilit kishte shkurtuar buxhetin me 3.92%.

Akti i Normativ, i miratuar në fshehtësi të plotë, ka vulosur uljen me rreth 25 mld lekë shpenzimet qeveritare. Buxheti i ri do të zvogëlojë me 2.67 miliardë lekë (18%) investimet në ujësjellësa dhe kanalizime, sikundër do të shkurtojë me 1.79 miliardë lekë (8.7%) investimet në infrastrukturën rrugore. Sektori prioritar i bujqësisë, që këtë vit duhet të pësonte një rritje, do të ketë 520 milionë lekë, 26% më pak investime për një nga sektorët që aq shumë përzemër e kishin si mazhorancë.

Ndryshe nga se propagandon qeveria se rishikimet nuk prekin prioritetet e kësaj mazhorance, akti normativ do të prekë në mënyrë të drejtë për drejtë, duke përgjysmuar me 50% fondin e investimeve në fushën e shëndetësisë. Duke e ulur këtë fond nga 18 miliardë lekë në 9 miliardë lekë. Investimet në fushën e arsimit, një tjetër prioritet i qeverisë në kontratën me shqiptarët, do të shkurtohen me 36% apo 1.3 miliardë lekë më pak për investime për të rinjtë dhe të rejat në fushën e edukimit.

Me sa duket nuk kemi parë ende asgjë; qeveria e majtë që në preambulën e programit të saj kishte barazinë dhe drejtësinë ndaj më të varfërve dhe moshës së tretë, ka vendosur që të ulë shpenzimet për sigurimet shoqërore dhe shëndetësore. Sipas buxhetit të rishikuar, qeveria do të ulë me 800 milionë lekë shpenzimet për sigurimet shoqërore, duke i vënën një tjetër gur të rëndë në kurrizin e pensionistëve. Me të cilët pasi u tall me një rritje pensionesh që nuk indeksonte as inflacionin, tanimë u rëndon akoma më tej pagesat e tyre duke i marrë para nga arka që ishin të destinuara për to.

Sot vendi ka më shumë të papunë se sa dje, kjo si pasojë e politikave të gabuara, politikave fiskale të nisura si pasojë e interesave personalë të disa personave në kurriz të së mirës sonë të përbashkët. Qeveria sërishmi ka vendosur që t?u bie në qafë të pamundurve dhe të papunëve, duke qenë se me aktin e ri normativ, kjo qeveri ka vendosur që të ulë me 200 milionë lekë pagesën e papunësisë, edhe pse shqiptarët të papunë janë më shumë se sa një vit më parë.

Ky është realiteti i shifrave dhe fakteve që qeveria duhet të përballet. Mirëpo, sot ajo është me pushime dhe nuk dëshiron të shqetësohet, megjithëse rritja ekonomike as që i afrohet 2.5%. Realitet që ka shqetësuar jo vetëm opozitën por edhe partnerët ndërkombëtarë, të cilët të alarmuar gjithnjë e më shumë po i thërrasin një qeverie e cila ka vendosur të bëjë sikur nuk dëgjon.

E gjithë kjo situatë, vjen si pasojë e një politike fiskale abuzive që do të sjellë si përfundim kolapsin e plotë ekonomik dhe fiskal të një shteti që vuan nga paaftësia dhe nga abuzimi administrativ. Nuk është çudi që për dy vite me kokëfortësi insistuan që rritja e taksave nuk do kishte ndikim, ndërkohë që informaliteti është rritur në shifra alarmante, kreditimi i ekonomisë ka rënë, depozitat kanë rënë. Për këtë arsye alternativa e propozuar nga ne, alternativa e taksës së sheshtë 9% do të sjellë frymëmarrje për ekonominë, duke i dhënë mundësi biznesit të rigjenerohet nga këto dy vite krize e do ta bëjë Shqipërinë përsëri konkuruese në rajon.

Akti Normativ është dëshmia e dështimit të politikave, të rritjes së taksave, të presionit, të policisë tek bizneset. Ai gjithashtu, është një tjetër sinjal alarmi për një mazhorancë që me arrogancë dhe mendjemadhësi po e çon vendin drejt një gremine ku më të humburit do të jenë qytetarët.

Deklarata për mediat e deputetes së PD, Jorida Tabaku. 7 Gusht 2015