200 pedagogë kundërshtojnë ligjin e Ramës dhe Nikollës që favorizon Çilin

8 Korrik 2015, 09:09, Aktualitet CNA

Pedagogët e Forumit për Liritë Universitare kanë dorëzuar dje në Komisionin parlamentar të Edukimit dhe Medias një memorandum të firmosur nga më shumë se 200 persona, të cilët kundërshtojnë ligjin për arsimin e lartë të qeverisë. Përmes këtij memorandumi, ata kanë renditur ato pika ku çalon drafti i qeverisë. Përfaqësues të këtij forumi ishin dje të pranishëm në komision ku dhanë mendimet dhe sugjerimet e tyre ndaj draftit, teksa hodhën poshtë mjaft nene. Akademiku Artan Fuga, e cilësoi ligjin si një ligj jo për periudhën e sotme, ndërsa u shpreh se nëse ai miratohet në formën aktuale do të sjellë dëme të shumta për arsimin shqiptar. ?Mendimi ynë është se problem i parë i këtij projektligji krahas mjaft formulimeve pozitive, ne kemi në radhë të parë një problem kulturor. Frymë e projektligjit na duket në radhë të parë e prapambetur sepse karakterizohet nga një pozitivizëm i shekullit 19. Flitet për standarde të unifikuara të vlerësimit të cilësisë me idenë e shekujve të kaluar që e vërteta është unike, mund të standardizohet dhe nuk është ashtu sikurse konsiderohet e vërteta shkencore sot, si një vend dialogu?, deklaroi Fuga. Më tej përgjegjësi i Departamentit të Gazetarisë dhe Komunikimit u shpreh se Ministria e Arsimit nuk ka marrë aspak për bazë sugjerimet e tyre.

Fondet për privatin

Profesor Artan Fuga u është përgjigjur dje dhe deklaratave të kryeministrit Edi Rama, i cili u shpreh se asnjë lekë nga buxheti i shtetit nuk do të shkojë tek universitetet private. Fuga deklaroi se pretendime të tilla nuk qëndrojnë, pasi me ligjin e ri për arsimin e lartë do të ketë fonde dhe për privatin. ?Ne nuk mundemi të pranojmë që buxhetet publike të shkojnë tek operatorët privatë në kushtet kur diplomat po zhvlerësohen. Dhe ato diploma në treg kanë një vlerë reale gjithnjë e më të ulët, sepse papunësia intelektuale, këtë investim të madh që bën familja shqiptare dhe që mund të bëjë buxheti i Republikës së Shqipërisë, të shkojë në prodhime diplomash që në treg nuk kanë vlerë?, vijoi ai. Një problematikë tjetër e ngritur nga akademiku është dhe modeli se ku bazohet ky draft. Sipas Artan Fugës, deri më tani Ministria e Arsimit nuk ka dhënë një përgjigje të qartë se ku bazohet modeli. Po ashtu ai tha se stafet akademike janë të bindura se nuk ka asnjë model në vendet e Bashkimit Evropian.

Tarifat e studimit

Pedagogët e Forumit për Liritë Universitare janë shprehur dje gjatë seancës dëgjimore në Komisionin parlamentar të Edukimit, se nëse ligji për arsimin e lartë miratohet në formën aktuale, atëherë shumë shpejt mund të ndodhë dhe rritja e tarifave studimore. Profesor Fuga kundërshtoi ashpër dhe planin e qeverisë për dhënien e kredive studentore, duke u shprehur se duhet të bëhet kujdes. ?Konkurrenca do të sjellë, që granti siç thotë projektligji që jep buxheti publik vihet në të njëjtën listë që jep pagesa studentore, jo më për regjistrimin, por pagesa për studimet. Çka do të thotë që nëse universitetet do të ndodhen para një situate të caktuar sigurisht që do të rrisin çmimet dhe tarifat e studimit dhe jo të regjistrimit dhe duke hyrë në një situatë financiare shumë të vështirë, çfarë do të bëjnë? Do të bëjnë atë që bëjnë universitet private sot, pa ju hedhur gurin, por nga një anë çmimet në treg mbahen të larta, ulen shpenzimet në dëm të cilësisë?, tha ai. Fuga deklaroi dje se ligji për arsimin e lartë është bërë në ndikimin e privatit./ Sot