Brenda 15 ditëve nis procesi i zbardhjes së emrave të spiunëve të Sigurimit

29 Maj 2015, 06:26, Politikë CNA

Nuk do të ketë qetësi dhe paqe për spiunët e Sigurimit të Shtetit. Kreu i Shërbimit Informativ Shtetëror, Visho Lika, ministri i Brendshëm, Saimir Tahiri dhe ministrja e Mbrojtjes, Mimi Kodheli, kanë nisur procesin e seleksionimit dhe të përgatitjes së dosjeve të spiunëve të Sigurimit të Shtetit për t?i vënë në dispozicion të Autoritetit të ngarkuar me ligj për hapjen e dosjeve.

Me hyrjen në fuqi të ligjit, Shërbimi Informativ Shtetëror, Ministria e Brendshme dhe Ministria e Mbrojtjes, janë detyruar që brenda një afati kohor prej tre muajsh, t?i vendosin në dispozicion komisionit të posaçëm të gjitha dokumentet për veprimtarinë e Sigurimit të Shtetit. Ndërkaq, për mënyrën e procedimit dhe administrimit të dokumenteve nga Autoriteti i Hapjes së Dosjeve do të ketë akte nënligjore të miratuara nga qeveria.

Këto janë dhe arsyet që mazhoranca nuk është ngutur për të botuar ligjin në Fletoren Zyrtare, ligj i cili u botua vetëm dje, ndonëse në Parlament u miratua një muaj më parë. Sipas nenit 14, çdo autoritet publik dhe arkiv, me kërkesën e Autoritetit, i dorëzon atij dokumentet e ish-Sigurimit të Shtetit që gjenden pranë tyre, duke përfshirë kopjet dhe dublikata të tjera. E njëjta gjë do të ndodhë edhe me personat fizikë dhe juridikë.

Nishani firmos ligjin

Pas zvarritjes disa javore të ligjit të dosjeve, kreu i shtetit, Bujar Nishani, ka bërë dekretimin e tij. Teksa rrëzimi i propozimit të Mesila Dodës dhe Shpëtim Idrizit u botua në Fletoren Zyrtare shumë shpejt, nuk ndodhi e njëjta gjë me draftin e qeverisë. Vetëm dje është zbardhur dekreti i Presidentit, i cili ka firmosur ligjin e dosjeve, duke i hapur tani rrugën zbulimit të spiunëve dhe të kaluarës së hidhur të Sigurimit të Shtetit. Ligji botohet në Fletoren Zyrtare Pas dekretimit të ligjit për spiunët, dje ai është botuar në Fletoren Zyrtare dhe brenda 15 ditësh do të bëhet futja e tij në fuqi. Në këtë mënyrë do të nisë dhe puna për hapjen e dosjeve të ish-Sigurimit të Shtetit.

Në nenin 44 është përcaktuar dhe rruga që do të ndiqet tani. Një muaj pas hyrjes në fuqi të ligjit, Kuvendi do të zgjedhë anëtarët e Autoritetit. Dy muaj pas ngritjes së Autoritetit, rrjeti arkivor paraqet informacion pranë Autoritetit dhe vë në dispozicion të tij informacionet dhe dokumentet e kërkuara prej tij, sipas këtij ligji. Ndërsa tre muajve nga fillimi i funksionimit të Autoritetit, Ministria e Brendshme, Ministria e Mbrojtjes dhe SHISH duhet të kenë kaluar në administrim tek Autoriteti të gjithë arkivin e ish-Sigurimit të Shtetit. Nga ana tjetër, Këshilli i Ministrave, brenda dy muajve nga hyrja në fuqi e këtij ligji, miraton aktet nënligjore për procedurën e kalimit në administrim të Autoritetit të materialeve arkivore, mënyrën e ruajtjes fizike të tyre, si dhe tarifat e pagesat. Procesi i hapjes së dosjeve do të jetë me pagesë dhe tarifa do të vendoset me vendim të Këshillit të Ministrave. Ndërsa autoriteti, brenda tre muajve nga hyrja në fuqi e këtij ligji, miraton rregulloren e organizimit dhe funksionimit të tij.