Pedagogët dhe studentët paralajmërojnë mbylljen e universiteteve

11 Prill 2015, 06:28, Sociale CNA

Pedagogë dhe studentë janë duke u përgatitur për një qëndresë të ashpër përballë Çilit dhe Nikollës, në mënyrë që të rrëzojnë draftin për arsimin e lartë, duke kundërshtuar në këtë mënyrë financimin e universiteteve private nga buxheti i shtetit. Prej disa ditësh ka pasur reagime të ashpra ndaj këtij drafti, ku tani si mundësi përveç protestave shihet edhe bojkoti apo zaptimi i universiteteve, duke bllokuar në këtë mënyrë mësimin.

Parashikohet që të ketë një reagim të fuqishëm në shumë universitete publike, ku studentët do të braktisin mësimin dhe do të bëjnë zaptimin e shumë prej godinave në mënyrë që ky ligj të mos miratohet, pasi sipas tyre, do të sjellë rrënimin e universiteteve publike dhe do të favorizojë ato private. Përfaqësues të Lëvizjes për Universitetin, kanë thënë për gazetën se forca e reagimit do të varet nga ajo se çfarë do të ndodhë në komisione. ?Kemi në plan që të zhvillojmë shumë shpejt një tjetër protestë, por gjithçka do të varet nga ajo se çfarë do të ndodhë në komisione. Ne do vijojmë ta kundërshtojmë fort draftin dhe mund të shkojmë drejt bojkotit apo zbatimeve?, u shpreh Xhuliano Bregasi, anëtar i kësaj lëvizje.
Pedagogët kundër
Përkrah angazhimit të studentëve ka edhe shumë pedagogë, të cilët janë shprehur se ky draft do të sjellë dëme të mëdha për universitetet publike. Pedagogu i Fakultetit të Shkencave të Natyrës, Jani Marka, ka thënë në një prononcim për gazetën ?Sot?, se i gjithë drafti është hartuar për interes të universiteteve private, të cilat përmes tij do të përfitojnë fonde nga taksapaguesit shqiptarë. Ai tha se qëndresa ndaj draftit do vijojë.
?Një ndër pikat kryesore që ne e kritikojmë është financimi i privatëve. Kjo është një reformë edhe e lobuar dhe e mbështetur nga universitetet private, të cilat janë në krizë. Meqë duke u shndërruar në një farë institucioni, që quhet universitet publik i pavarur, ato do të përfitojnë fonde publike. Ndërkohë që vetë ministria thotë që 93 përqind e studentëve janë të publikut. Dhe universiteteve publike, mesa di unë nuk i ka shkuar kurrë kujt ndërmend të propozojë një universitet të tillë. Kjo vjen nga një propozim që vjen jashtë universiteteve publike?, tha ai.
Më tej pedagogu Marka është shprehur se edhe aktualisht fondet për universitetet publike janë shumë të pakt dhe ndarja e tyre me privatët do të sillte rrënim. Gjithashtu ka thënë se kjo do të sjellë rritjen e tarifave për studentët. ?Reforma është problematike në shtyllat e saj kryesore. Skema e financimit dhe mënyra e organizimit. Kjo si në të përgjithshëm institucional dhe si të brendshëm, me shumë burokraci, senat, bord, që përplasen. Tjetër, mendojmë se mund ta tregtarizojnë universitetin duke e çuar drejt rritjes së tarifave, që bie në kurriz të studentëve. Edhe sot që flasim tarifat janë shumë të larta?, vijoi ai. Marka u shpreh se kjo reformë që tentohet të bëhet në arsimin e lartë është e pa përshtatshme për një vend si Shqipëria.