Pritet përjashtimi i Tom Doshit nga PS, Rama porosi deputetëve nga Brukseli

28 Shkurt 2015, 07:48, Aktualitet CNA

Përplasja mes deputetit socialist, Tom Doshi dhe kryeministrit Edi Rama, ka rrëshkitur në një pikë dhe stad të tillë saqë rikuperimi dhe paqja duket se është e pamundur. Edhe pse Tom Doshi ka dhënë dje shenja paqeje, shpërthimi ka tejkaluar kornizat e akuzave të rënda, duke hyrë në fushën e shantazhit dhe kërcënimit të kryeministrit Rama.

Pavarësisht ndërhyrjeve dhe lëvizjeve për paqe, konflikti duket se do të zgjidhet me përjashtimin e Tom Doshit nga grupi parlamentar socialist. Një ditë pas kërcënimeve të Doshit se do të trondisë qeverinë dhe gjesteve kërcënuese ndaj kryeministrit, në Partinë Socialiste ka nisur të diskutohet mundësia e përjashtimit të Doshit nga grupi parlamentar i PS.

Të kontaktuar, deputetë pranë Edi Ramës dhe Gramoz Ruçit, nuk e kanë përjashtuar mundësinë e përjashtimit të deputetit në mbledhjen e grupit parlamentar, që të do të mbahet në fillim të javës së ardhshme. Mundësitë për përjashtim rriten më tej, kur Ruçi dhe Rama kanë njoftuar deputetët që të mos mungojë asnjë në mbledhjen e ardhshme të grupit parlamentar, e cila do të mbahet ditën e martë. Edhe pse largimi i Doshit mund të përkthehet me një rezultat negativ të PS në Qarkun e Shkodrës, akuzat e artikuluara nga deputeti, janë një kosto e papërballueshme për qeverinë.

Sipas gazetes “Sot”, Edi Rama, Gramoz Ruçi dhe Taulant Balla po bëjnë të gjitha llogaritë për koston politike në Bukuresht. Në të njëjtën kohë, deputetët janë porositur me telefon për të qenë të bashkuar dhe të unifikuar për vendimin përfundimtar. Një pjesë e deputetëve, pohuan se mbledhja e jashtëzakonshme do të mbahet ditën e martë, ndërsa të tjerë thanë se mbledhja do të mbahet jashtë radhës, ditën e hënë.

Gjithsesi, një gjë është e sigurt, se mbledhja e radhës së grupit parlamentar socialist, do të jetë vendimtare për fatin e Tom Doshit dhe karrierën e mëtejshme të deputetit në Partinë Socialiste. Disa deputetë janë kundër një mase të tillë radikale ndaj kolegut të tyre, ndërsa kërkojnë që Doshit t?i jepet një mundësi për reflektim. Por, shumica e deputetëve, bashkë me Ramën, ministrat dhe drejtorët janë pro përjashtimit.