Rama replika në FB/ Ulëm cmimin e energjisë

27 Dhjetor 2014, 15:33, Aktualitet CNA

Është rritur apo jo çmimi i energjisë elektrike?
Këto dy ditë ka pasur debate të shumta për këtë gjë, por kryeministri Edi Rama thotë se realisht nuk kemi rritje të çmimit të energjisë elektrike.
Rama ka replikuar me komentuesit e shumë në faqen e tij në Facebook, të cilët i kërkojnë llogari për rritjen e energjisë.
Ai i ka sqaruar ata se çmimi mesatar i energjisë në fakt ka rënë, pasi nga 9.9 deri në 10.3 lekë, është bërë 9.5 lekë.
Kryeministri tha se 7.7 lekë ka qenë për ata që ishin nën fashën 300 kWh, por ata do të kompensohen nga qeveria.
Kështu që, sipas Ramës, debatet për rritjen e energjisë janë spekulime të pastra dhe të pavërteta.
?Siç duket shumë nga llogaritarët që komentojnë këtu, ose nuk e kanë paguar ndonjëherë vetë energjinë, ose, të më falin, po e kanë vjedhur!
Ose pastaj thjesht flasin kot, duke harxhuar lekët e Internetit për të vrarë kohën?
Sepse çmimi i energjisë ka qenë 7.7 lekë vetëm për fashën 300KW, e cila u vendos medemek për të mbrojtur të varfërit.
Po çfarë ndodhi?
U futën pas fashës edhe vjedhësit e energjisë, dhe fasha mbrojtëse e të varfërve u kthye në mburojë e hajdutërisë.
Duke hequr fashën çmimi bëhet i njëjtë për të gjithë konsumatorët dhe ata që duhen mbrojtur nga heqja e fashës, qeveria i mbron me pagesë të drejtëpërdrejtë në pagën e pensionit, të invalidit apo të familjes në ndihmë ekonomike.
Të tjerët do të paguajnë mbi bazën e çmimit mesatar, i cili në janar bëhet 9.5 lekë për të gjithë konsumatorët familjarë, nga 9.9 deri 10.3 që varion sot ? pra çmimi mesatar ulet, jo rritet!
Kjo është aritmetika e thjeshtë e çmimit të energjisë, dhe jo hesapi pa hanxhiun i atyre që thonë ?Ishte 7.7, u bë 9.5?!
Sepse, e përsëris, 7.7 është vetëm për fashën dhe nuk është çmimi i sotëm mesatar i energjisë për të gjithë!
Heqja e fashës dhe vendosja e çmimit mesatar fiks i jep fund vjedhjes masive dhe vendos një sistem të drejtë, ku askush nuk mund të shmanget në kurriz të më të varfërve, siç ka ndodhur deri sot.
Kush nuk është pensionist kryefamiljar, invalid apo anëtar i një familjeje me ndihmë ekonomike, nuk do të paguajë më shumë, po vetëm aq sa i takon, në bazë të konsumit që bën.
Të tjerat janë spekulime të turpshme për interesa të ulëta politike, ose thjesht hesape të gabuara, për faj të të mësuarit keq, duke e shpenzuar energjinë si mall pa zot?, thotë Rama.