Cani: 86% e të ardhurave në buxhet nga tatimet

11 Nëntor 2014, 23:00, Ekonomi CNA

Komisioni parlamentar i Ekonomisë vijon diskutimet mbi pr/buxhetin e vitit 2015 dhe paketën fiskale, ndërsa të pranishëm kanë qenë ministri i Financave Shkëlqim Cani, Drejtoresha e Përgjithshme e Tatimeve Briseida Shehaj dhe ajo e Doganave Elisa Spiropali.

Ndërsa është ndalur në kritikat e opozitës mbi paketën fiskale, ministri Cani theksoi se përgjatë qeverisjes 2009-2013 të Partisë Demokratike, performanca fiskale ka qenë negative. Sipas Canit, edhe ulja e taksave është bërë me qëllim për të fituar votat nga ana e opozitës aktuale.

?Gjatë viteve 2009-2013 performanca fiskale ka qenë negative. Në 2009-2013 u ulën taksat që të fitonin votat?, u shpreh Cani.

Në vijim ai shtoi se në buxhetin e vitit 2015 janë parashikuar që të ardhurat më të mëdha të jenë nga tatimorët, në masën 86%, si dhe gjithashtu të ardhurat nga ndihmat dhe të ardhurat nga jo tatimorët.

Cani theksoi se është optimist për buxhetin e vitit të ardhshëm, ndërsa shtoi se për këtë vit qeveria ka arritur të tejkalojë objektivat e saj.

?86% e të ardhurave janë tatimore 8% të ardhura nga ndihmat dhe 6% të ardhura jo tatimore. Kemi realizuar dhe tejkaluar objektivat. Të ardhurat tatimore janë 13,3% më të larta?, tha Cani.

Ndërsa duke u ndalur tek buxheti aktual ai tha se kemi realizuar dhe tejkaluar objektivat, duke sqaruar se të ardhurat tatimore janë 13,3% më të larta?.

Drejtoresha e Përgjithshme e Doganave, Elisa Spiropali në fjalën e saj para Kuvendit deklaroi se administrata doganore ka arritur të mbledhë 10 miliardë lekë më shumë duke e krahasuar me një vit më parë.

?Në dy vite arritëm atë që nuk u arrit për 6 vite. Kemi mbledhur 10 mld lekë më shumë, ndaj them se jemi në rrugën e duhur.

Kemi një plan të qartë për formalizimin e karburantit në të gjithë nivelet, deri kur arrin në pikat e karburanteve. Gjithashtu ka rritje të arkëtimeve nga prodhimet vendase, si birra. Rritja është konstante dhe e fortë?, tha Spiropali.

Spiropali tha se doganat vazhdojnë luftën kundër informalitetit dhe evazionit fiskal, ndaj ka edhe një rritje të numrit të kallëzimeve penale.

?Kemi një rritje me 56% të kallëzimeve penale që kemi bërë ne në drejtim të kompanive shkelëse të ligjit. Në 4 kontrolle që ne bëjme, një kapet me shkelje.

Bashkëpunimi me policinë dhe prokurorinë është i mirë, por kërkojmë çuarjen në fund të çështjeve që ne ngremë, që ata që nuk paguajnë detyrimet dhe shkelin ligjin të dënohen, duke i prerë hovin kështu evazionit fiskal?, u shpreh Drejtoresha e Përgjithshme e Doganave.

Optimizëm për buxhetin e vitit të ardhshëm ka shprehur edhe Drejtoresha e Përgjithshme e Tatimeve Briseida Shehaj.

?Administrata tatimore ka një tejkalim të planit me 2%. Biznesi ka një lehtësim të procedurav, ka rritje të sigurimeve shoqërore me 10.2% nga të ardhurat e kontributeve shoqërore. Sot që flasim, shifra e evazionit është 100 milionë dollarë. Shifra është alarmante. Ky është realiteti që ne përballemi deri sot?, tha Shehu..

Ajo është ndalur tek parashikimet e vitit të ardhshëm, ku një prej arsyeve për të qenë optimistë sipas saj është sistemi i ri i administratës tatimore.

?Sistemi i ri bën një automatizim të rimbursimit të TVSH-së. Kemi një strukturë totalisht të re të administrata tatimore për 2015. Do të heqim zyrën e vlerësimit. Kemi një departament të ri që do merret vetëm me TVSH-në. Problemi jonë i madh është borxhi. Ndaj administrata tatimore do kryejë vetë edhe ankandet për shitjen e pasurive?, tha Shehaj.