Shqiptarët qindra milion dollarë më shumë buxhetit nga taksat

31 Tetor 2014, 23:00, Aktualitet CNA

Disa nga taksat e ?planit B? të Fondit Monetar Ndërkombëtar duket se do të bëhen realitet vitin e ardhshëm. Fjala është përshembull për taksat vjetore të automjeteve. Në paketën e re fiskale, që po përgatitet nga Financat, nuk është planifikuar rritje nominale e saj, siç sugjeronte FMN, por gjithsesi është vendosur një kufi minimal për të, duke rritur kështu kuotën e pagesave për mijëra makina.Formula e parashikuar nga ekspertët e qeverisë është e thjeshtë: kush ka makinë me moshë mbi tre vjet përdorimi nuk mund të paguajë një taksë më të vogël se 10 mijë lekë. Rezulton, sipas relacionit të këtij projektligji, se janë 193 mijë përdorues makinash që aktualisht paguajnë më pak se kjo shifër në formë takes vjetore, si pasojë e llogaritjes cilindrata e motorrit X koeficienti sipas vjetërsisë X lloji i karburantit që përdoret (diesel apo benzinë).

Në këtë mënyrë, vendoset një taksë dysheme. Sipas ministrisë, kjo do të ndihmonte në harmonizimin e trajtimit fiskal të karburanteve për efekt të ndotjes së mjedisit dhe përdorimit të infrastrukturës rrugore. Por, natyrisht, do të shtonte edhe të ardhurat buxhetore. Përjashtim nga taksa e re dysheme parashikohet për motomjetet (ciklomotorë, me 2 ose 3 rrota).

Këto paguajnë deri tani një taksë 200-1.000 lekë në vit. Efekti në të ardhura shtesë buxhetore do të jetë 116 milionë për pushtetin vendor dhe 520 milionë lekë për pushtetin qendror. Në total, qytetarët do të taksohen 4.5 milionë euro më shumë se sa deri tani, duke filluar nga viti i ardhshëm, gjithnjë në rast se Kuvendi e miraton këtë draft.

Gjithnjë në fushën e taksave që lidhen me transportin, edhe taksa e qarkullimit, që paguhet në çmimin fundor të karburantit, e cila aktualisht është 17 lekë për litër, nga një janari do të shkojë në 27 lekë për litër. Së bashku me efektin që vjen nga Tatimi mbi Vlerën e Shtuar, qytetarët do të paguajnë në totalë 6.7 miliardë lekë ose 67 milionë dollarë më shumë për këtë taksë.

Ndryshime të tjera në taksa kanë të bëjnë me rritjen e akcizës së duhanit me 20 lekë të tjera për paketë. Ndërkohë, qeveria do të marrë 50 milionë dollarë shtesë në buxhet krahasuar me nivelin aktual nga rritja në 15% e taksave mbi të ardhurat personale, si dividenti, pronat që jepen me qira, interesat e depozitave në banka, e drejta e autorit, pronësia intelektuale dhe çdo burim tjetër veç pagës.

shqiptarja.com