Totenhemi në krizë, kërkohet rikthimi i ish-trajnerit

9 Mars 2023, 14:21, Sport CNA

Totenhemi në krizë. Pas një sezoni me ulje-ngritje, skuadra e Antonio Kontes është jashtë garës për ta mbyllur sezonin me një trofe.

I vetmi objektiv i mbetur është vendi i katërt në Premier League për t'u kualifikuar sezonin e ardhshëm në Champions League.

Në kampionatin anglez, gara për titullin kampion është thuajse e mbyllur, pasi renditja e tregon më së mirë këtë gjë, me Arsenalin dhe Man. Siti që do të luftojnë deri në fund për të triumfuar në Premier League.

Gara bëhet akoma më interesante për vendin e tretë dhe të katërt që të dërgon në Champions League. Janë katër skuadra që do të luftojnë deri në fund për një vend në kompeticionin më të rëndësishëm europian: Man. Junajtid, Totenhemi, Liverpuli dhe Njukasëlli.

Me fitoren e fundit kundër “Djajve të Kuq”, Liverpuli ngushtoi diferencën me tri pikë ndaj Totenhemit të vendin të katërt, mbi të gjitha “të kuqtë” kanë edhe një ndeshje më shumë për të luajtur. Ndërsa skuadra e Antonio Kontes u mund nga Uolves, duke lëshuar sërish terren.

Së fundmi, Totenhemi u eliminua edhe nga Champions League nga Milani. Ndërsa në fillimin e muajit mars, "Spurs"-at u eliminuan edhe në Fa Cup, pasi u mundën nga Sheffiield Utd, duke hequr dorë nga një mundësi e mirë për të fituar një trofe.

Nisur nga situata që po përjeton Totenhemi, sirenat e alarmit bien për Antonio Konten. Italianit i përfundon kontrata në fundin e sezonit dhe me shumë mundësi nuk do t’i rinovohet.

Pas eliminimit nga Champions League, Kontes i kanë dalë kundër edhe tifozët e ekipit, që kërkojnë rikthimin e Mauricio Poçetinos.

Mediet britanike kanë raportuar se tifozët e “Spurs”, pas ndeshjes me Milanin, kanë kënduar në kor këngën e famshme që i është dedikuar trajnerit argjentinas në periudhën 5-vjeçare të tij te Totenhemi.

“Ai është magjik dhe ju e dini”. Ky ishte kori i tifozëve drejtuar drejtuesve të Totenhemit. Poçetino vijon të jetë i papunë që prej largimit të tij nga PSG-ja.

Argjentinasi ia doli mbanë ta dërgonte klubin londinez deri në finalen e Champions-it në sezonin 2018-2019, por pa sukses, pasi në fund triumfoi Liverpuli.