E fundit!

18:28 Aktualitet

Të enjten seanca e fundit e sesionit parlamentar/ Në rend dite, një sërë projektligjesh

Seanca e fundit plenare e këtij sesioni parlamentar do të ...

Statistika interesante/ Derbi vendimtar për titullin, si shkojnë te goli Tirana dhe Partizani

11 Maj 2023, 21:06, Sport CNA

Statistika interesante/ Derbi vendimtar për titullin, si shkojnë te

Golat bëjnë diferencën në një ndeshje futbolli. Tirana dhe Partizani kanë shënuar respektivisht 48 dhe 47 gola në këtë sezon të Superiores dhe po rivalizojnë me njëra-tjetrën për të fituar titullin kampion. Vlen të theksohet që pa Xhixhën dhe Skukën të dyja skuadrat kanë humbur 2 goleadorët e fillimit të sezonit.

Të mërkurën në mbrëmje dy ekipet do të matin sërish forcat në “Air Albania”, në një sfidë që do të përcaktojë shumë për titullin kampion, për të mos thënë gjithçka.

Në këtë sfidë do të mungojë golashënuesi më i mirë i Tiranës dhe i Superiores, Florent Hasani sepse plotësoi numrin e kartonëve.

Por si kanë shënuar të dyja skuadrat në këtë kampionat? Sa gola nga jashtë zone dhe sa brenda saj? Cila prej dy ekipeve pretendente sulmon nga ajri dhe cila ka armë të fortë në goditjet standarte?

Le ta nisim nga skuadra e Tiranës si pritëse e derbit dhe si skuadra që ka sulmin më të mirë të kampionatit.

Bardheblutë kanë çuar në rrjetë 9 futbollistë të ndryshëm pa llogaritur të larguarit dhe shumicën e golave i kanë realizuar brenda zonës, pra 43 nga 48. Vetëm 4 gola i kanë shënuar nga jashtë kuadratit të zonës, ndërsa 1 është autogol i Damcevskit në duelin kundër Bylisit. Nga golat jashtë zone vlejnë të përmenden ata të Redon Xhixhës në fillimin e kampionatit.

Por cila është këmba e preferuar e bardhebluve? E djathta. Me të kanë shënuar 27 gola, ndërsa me të majtën 14 gola dhe 6 me kokë.

Skuadra e Shehit ka arritur që të shënojë 34 gola me aksion dhe 13 me topa të ndalur duke llogaritur këtu, penalltitë, këndoret apo goditjet e dënimit.

Ka edhe një tjetër aspekt interesant te skuadra e Tiranës që e provon portën në të gjitha anët dhe ka një shpërndarje golash. 16 të tillë i ka shënuar nga e majta, ose e djathta e portierit, 17 gola në mes dhe 14 nga e majta e portierit.

Po Partizani si i ka shënuar 47 golat në këtë sezon?

Trajneri Giovani Colella ka në dispozicion 10 goleadorë, edhe këtu nuk llogariten të larguarit në merkaton e janarit. Ndryshe nga Tirana, diferenca është që “Demat” kanë arritur të realizojnë 35 gola brenda zonës dhe 12 jashtë saj. Kjo është një armë e fortë në këtë sezon, ku Tedi Cara, Skuka, Da Silva, Hoti dhe të tjerë kanë arritur që të thyejnë portierët kundërshtarë nga larg.

Partizani ka arritur të realizojë 29 gola me këmbën e djathtë dhe 12 gola me të majtën, ndërsa me kokë 6 të tillë ashtu si skuadra e Tiranës. Bie në sy fakti që bardheblutë shënojnë më shumë me ta majtën dhe kjo falë Florent Hasanit.

Ka një ngjashmëri të frikshme sa iu përket golave me aksion apo topat e ndalur. Partizani ashtu si Tirana kanë arritur të realizojnë nga 34 gola me aksion dhe 13 topa të ndalur, penalltitë, kornet dhe skemat. Kjo është interesante sepse Partizani ka arritur të realizojë 2 gola me skemë, Skuka ndaj Bylisit në transfertë dhe Da Silva ndaj Erzenit, madje shumë e ngjashme.

Partizani ka arritur të realizojë 19 gola nga e majta, 17 nga e djathta dhe 11 gola në mes të portës.