“Ringjallet” Lukaku, “bomberi” belg “tërheq” Interin drejt fitores

23 Prill 2023, 14:29, Sport CNA

Interi ka luajtur sot në mesditë kundër Empolit në shtëpinë e këtyre të fundit.

Interi ka mundur të menaxhojë mirë pjesën e parë, duke qarkulluar topin nga çdo pozicion i mundshëm, por nuk ka arritur dot të gjejë golin. Zikaltrit patën disa mundësi të mira, me Brozoviçin në fillim të ndeshjes, por topi u bllokua nga kundërshtarët brenda zonës. Më pas ka pasur edhe një mundësi të artë Galiardini me një goditje nga distanca, por topi kaloi sipër traut të portës.

Gjjithashtu edhe Empoli ka pasur dy raste të rrezikshme, por në të dyja herët ka qenë Handanoviçi, i cili është treguar i vëmendshëm.

Në afërsi të 15 minutave të fundit, Parisi bëri një ndërhyrje tepër të ashpër ndaj D’Ambrosios duke e goditur me takë të ngritur, por gjyqtari kryesor dhe VAR-i e kanë kursyer lojtarin e Empolit duke i treguar vetëm kartonin e verdhë.

Pjesa e dytë ishte ashtu siç pritej nga reagimi i Interit. Zikaltrit kaluan në avantazh në minutën e 48-të me anë të Lukakut. Miqtë ndërtuan një aksion të bukur, kur në fund Brozoviç la topin brenda zonës për sulmuesin belg dhe me të djathtën Lukaku e dërgoi topin në rrjetë.

Interi tentoi disa herë të shënonte të dytin, por nuk po gjente hapësirat e duhura. Goli i dytë erdhi pas disa përpjekjeve në minutën e 76-të të sfidës. Një kundërsulm i shpejtë nga Interi, Çalhanoglu dërgoi topin në krahun e majtë të fushës, aty ku gjendej Lukaku, i cili me mjeshtëri deportoi brenda zonës dhe lëshoi menjëherë të majtën e tij potente në një kënd diagonal duke e bërë të pamundur për portierin e Empolit.

Për Kristjan Asllanin pati pak minuta lojë, pasi mesfushori shqiptar u aktivizua në minutën e 86-të.

Interi nuk është ndalur me kaq, pasi ka shënuar edhe golin e tretë përballë Empolit.

Në minutën e 88-të, përsëri një kundërsulm i shpejtë nga zikaltrit, i marrë përsipër nga njeriu i ndeshjes Lukaku, e ka lënë topin më pas për te Lautaro Martinez, ku argjentinasi me qetësinë e tij ka dërguar topin në rrjetë duke vulosur sfidën.

Me këtë fitore të rëndësishme, Interi ngjitet kështu momentalisht në vendin e pestë me 54 pikë, një më shumë se Milani.