web counter
LEXO PA REKLAMA!

SHKARKO APP

App Store
Google Play

Përcillet për në banesën e fundit ikona e futbollit/ Homazhe në Katedralen e Korçës

18 Mars 2024, 12:40, Sport CNA

Përcillet për në banesën e fundit ikona e futbollit/ Homazhe

Është përcjellë për në banesën e fundit ikona e futbollit korçar, Teodor Vaso. Ai u nda nga jeta mëngjesin e së dielës krejt papritur në moshën 82-vjeçare. Teodor Vaso konsiderohet si një nga legjendat e futbollit, njëri nga pesë sportistët e vitit 1968, i cili ka luajtur me ekipin kombëtar duke arritur rezultatin 0-0 me kampionen e botës, RF Gjermane. Në homazhet e mbajtura nga familja e të ndjerit kanë marrë pjesë shumë figura të njohura të botës së sportit, të cilët krahas ngushëllimeve kanë treguar edhe vlerat e Teodor Vasos.

Dhimitraq Xhambazi, një prej miqve më të afërt të Teodorit, po ashtu ikonë e futbollit korçar, ka treguar se Vaso ka qenë një nga lojtarët më të vlerësuar në kohën e tij për lojën e fortë dhe të shpejtë. Ndonëse i dëmtuar, Xhambazi thotë se Teodori ka mbajtur për 90 minuta ekipin gjerman.

Gazetari i njohur sportiv, Dëfrim Methasani, e ka konsideruar Teodor Vason simbol të Korçës dhe të futbollit shqiptar.

Përcillet për në banesën e fundit ikona e futbollit/ Homazhe

Po ashtu ai kujton ndeshjen me Gjermaninë, e cila u eliminua nga Kombëtarja shqiptare ku luante edhe Teodori.

Për trajnerin e futbollit, Robert Çingo, të flasësh për Teodor Vason është mjaft e vështirë. Me lot në sy ai thotë se Vaso u ka lënë një boshllëk të madh, ndërsa e konsideron si një lojtar me përmasa evropiane, i cili u bë edhe një trajner i admirueshëm.

Për Teodor Vason ka folur edhe At Ilia Kotnani, i cili ka qenë mik i familjes Vaso. Ai tregon rreth karrierës së tij futbollistike, me cilësi dhe virtyte shumë të larta, me një përgatitje fizike për t'u admiruar në pozicionin e tij të mbrojtësit.

Teodor Vaso pas homazheve në Katedralen e qytetit të Korçës u përcoll drejt varrezave me duartrokitje nga familjarët, miqtë dhe simpatizantët e tij. Teodor Vaso do të kujtohet për kontributin e vyer që i dha veçanërisht Korçës, por edhe futbollit shqiptar./ CNA





Lajmet e fundit nga