Mirel Josa: Ndeshja ndaj Tiranës e rëndësishme, pozitiv për ne aktivizimi me Kombëtaren

12 Nëntor 2022, 18:51, Sport CNA

Vllaznia dhe Tirana do të zhvillojnë sfidën e javës së 12-të të "Abissnet Superiore" në stadiumin "Selman Stërmasi" ditën e nesërme (13 nëntor). Ndeshja e cila do të startojë në orën 13:00, u zhvendos në kryeqytet pasi në stadiumin "Loro Boriçi" ka nisur mbjellja e barit të ri.

Para kësaj ndeshjeje trajneri Mirel Josa ka folur për objektivat e Vllaznisë në këtë takim. Klasikja shqiptare për trajnerin Josa, shihet si një ndeshje si të gjithë të tjerat, por nuk shmang për asnjë moment rëndësinë që ka për vazhdimësinë dhe qetësinë e Vllaznisë.

Sfida me Tiranën? Me interes do të priten të gjitha sfidat jo vetëm kjo, si në fillim të kampionatit që janë pritur me interes. Problemi është se sa i përqendruar do të jetë ekipi për të plotësuar objektivat.

Ndeshja më e mirë? Këtë e përcaktoni ju se cila ishte ndeshja më e mirë sipas opinionit tuaj. Ekipi ka bërë dhe ndeshja të tjera të mira, problemi është që gjatë periudhës kemi pasur oshilacione në lojë, qoftë nga negativiteti në pozitivitet. Ndeshja me Kukësin ishte pozitive, por duhet të harrojmë çfarë kemi bërë se do të numërohet vetëm ndeshja e fundit. Ndaj Tiranës është një ndeshje e rëndësishme.

Spostimi? Ky ishte opsioni i duhur. Me klubin kemi vendosur që të zhvillonim në Tiranë pasi dy të tjerat do të zhvillohen në Shkodër. E kam thënë që transfertat mbarojnë dhe tashmë do të luajmë shumë në shtëpi. Nuk kemi luksin të ndryshojmë nga ndeshja jashtë nga ajo brenda. Ekipi formon një mënyrë loje dhe e paraqet në fushë.

Aktivizimi me Kombëtaren? Kanë luajtur, njëri 90 minuta një tjetër 45 minuta dhe një tjetër 60 minuta. Për mua ka rëndësi që janë aktivizuar lojtarët. Nuk kemi pasur video të ndeshjes, por kemi diskutuar pasi ndeshjet kanë qenë kompetitive. Kjo është pozitive për ne.

Maksimumi ndaj Tiranës? Mua nuk më luajnë vetëm këta 3 futbollistë, por luajnë 11 lojtarë dhe pjesa tjetër është e gatshme. Unë jam i kënaqur për këta lojtarë dhe të gjithë që kanë qenë në skuadër janë stërvitur me entuziazëm. Ndeshja me Tiranën është një ndeshje si të gjithë ndeshjet e tjera.

Këtë nuk duhet ta themi dhe as ta marrim, se disa lojtarë luajtën mirë me Kukësin se disa lojtarë ishin të dëmtuar. Ne duhet ta marrim nga ana pozitive pasi kështu duhet të luajmë dhe ndaj Tiranës. Ne do të kërkojmë që të përmbushim objektivat tanë, nuk them objektivat përfundimtarë të ekipit. Por të marrim 3 pikët e radhës nesër pasi ekipi luan për objektivat javorë.

Ekipi luan më mirë në kryeqytet? Jo, nuk është kështu, ekipi luan mirë në Shkodër dhe ne mundohemi që të plotësojmë detyrat sa më mirë të jetë e mundur. Kështu që ne shkojmë drejt Tiranës për të luajtur futbollin tonë dhe për të pasur një skuadër me sa më pak probleme për vazhdimësinë.

Latifi? Ka nisur stërvitjen, ai ka pasur dhe problemin familjarë që të tilla paçim çdo javë, pasi është shtuar me fëmij. Tani presim të marrë formën fizike dhe të jetë i gatshëm, pasi do të jetë më i qetë nga ky aspekt.

Superkupa? E shoh si një ndeshje që do të vendosë ekipin më në ritëm kampionati.