E fundit!

18:28 Aktualitet

Të enjten seanca e fundit e sesionit parlamentar/ Në rend dite, një sërë projektligjesh

Seanca e fundit plenare e këtij sesioni parlamentar do të ...

Merkatoja e Partizanit nis me shitje, mbrojtësi i kuq ikën në verë

2 Qershor 2023, 15:16, Sport CNA

Partizani po shijon disa pushimesh, pas titullit kampion të fituar në ndeshjen e fundit ndaj Teutës. Të kuqtë janë shpërndarë nëpër familjet e tyre dhe pas rreth dy javësh do të kthehen në punë për të përgatitur ndeshjet e muajit qershor, që nisin me raundin e parë të Champions League. Objektivat e kësaj vere janë disa, por kryesori është kalimi i të paktën një turi në Champions, çka do t’i shtonte shumë të ardhurat nga Europa.

Merkatoja është objektivi tjetër i “demave” dhe në këtë aspekt pritet që gjithçka të nisë me shitjet. Vetë trajneri Kolela dhe drejtuesit e tjerë e kanë pranuar se nëse vijnë ofertat e duhura, do të ketë edhe largime në formën e shitjeve.

Një nga “yjet” më të shndritshme të të kuqve në këtë sezon ka qenë Andi Hadroj. Në një vit e gjysmë, pukjani ka arritur thuajse gjithçka në futbollin shqiptar. Është një nga mbrojtësit e djathtë më të mirë të kampionatit, është lojtari i vetëm i ftuar nga Kombëtarja në të gjithë Superioren, si dhe u shpall kampion.

Ish-lojtari i Bylisit është 24 vjeç dhe ka moshën ideale për të bërë hapin e madh drejt një kampionati elitar, ku do të rritej akoma më shumë si futbollist, por edhe do të siguronte një kontratë, e cila do t’i jepte të ardhura të konsiderueshme financiare.

"Panorama Spport" mëson se në drejtim të tij ka disa oferta. Mësohet se Superliga turke është destinacioni më i mundshëm për mbrojtësin, aty ku janë në lojë dy opsione.

Për momentin negociatat nuk janë finalizuar me asnjë prej klubeve, por në tavolinën e presidentit Demi janë disa propozime. Përveç Turqisë, që ka arritur të grumbullojë një numër të madh shqiptarësh, që kanë pasur sukses, për Hadrojn ka oferta edhe nga Italia, megjithëse në këtë rast shanset janë disi më të zbehta. Vlera në treg e Hadrojt është rreth 450 mijë euro dhe me një shifër të përafërt do të ishte i kënaqur edhe klubi i kuq.