web counter
LEXO PA REKLAMA!

SHKARKO APP

App Store
Google Play

Cikagol, sulmuesi i Kombëtares gjen rrjetën në miqësore. Klaus Gjasula drejt Bundesligës

22 Prill 2023, 11:24, Sport CNA

Sokol Cikalleshi ka shënuar një tjetër gol në Arabinë Sauditë edhe pse këtë herë ka qenë një takim miqësor. Sulmuesi i Kombëtares shqiptare vazhdon me formën e mirë, ku përveç tetë golave të shënuar mes kampionatit dhe Kupës, ka tundur rrjetën edhe në ndeshjen miqësore që skuadra e tij Al-Khalej ka fituar 2-0 ndaj Al-Qadsiah.

Ndërkohë sa i përket kampionatit, Cikalleshi është duke ndihmuar ekipin e tij që të qëndrojë mes më të mirave në Arabi, teksa ndodhen në vendin e parafundit me 17 pikë, ku kanë mbetur edhe shtatë javë nga fundi, mes tyre edhe një përballje kundër Al-Nasër, më datën 8 maj, ekipi që luan Kristiano Ronaldo.

Cikalleshi është i huazuar për një sezon në Arabi nga ekipi turk i Koniasporit dhe muajin tjetër kur të mbarojë sezoni do të rikthehet në Turqi.

KLAUS GJASULA – Është pranë rikthimit në Bundesligë. Mesfushori i Kombëtares shqiptare, i cili është pjesë e Darmshtadit në Gjermani, ka arritur ditën e djeshme fitoren e radhës me Karsluherin në shtëpi.

Pas disavantazhit që në start, golat e Manu dhe Tietc përmbysën ndeshjen. Gjasula u aktivizuar në minutën e 78-të dhe pas vetëm katër minutave në fushë, ai u ndëshkua me karton të verdhë pas një ndërhyrjeje të gabuar.

Teksa kanë mbetur edhe pesë javë deri në fund të kampionatit, Darmshtadi i Gjasulës është duke udhëhequr renditjen në Bundesligën 2, me pesë pikë më shumë se vendi i dytë, që po ashtu ngjitet direkt dhe shtatë pikë se vendi i tretë që luan “play off”-in.

Këtë sezon mesfushori ka luajtur 13 ndeshje në total, ndërkohë 33-vjeçari pas tri sezoneve mund të rikthehet mes më të mirave në Gjermani.





Lajmet e fundit nga