E fundit!

22:00 Aktualitet

VIDEO/ Ndryshim drastik i motit në Vlorë, stuhia përfshin qytetin bregdetar

Qyteti i Vlorës është përfshirë mbrëmjen e sotme nga një s...

Shtimi i rasteve të dhunës në familje/ Sociologia Dojçe: Problem mbetet mungesa e denoncimeve

2 Shtator 2024, 14:26, Sociale CNA

Shtimi i rasteve të dhunës në familje/ Sociologia Dojçe:

Sociologia Maria Dojçe

Gjatë tri ditëve të fundit janë regjistruar 3 raste të rënda të dhunës në familje, të cilat kanë ngritur alarmin që ky fenomen po merr përmasa të mëdha në juglindje.

Sociologia Maria Dojçe analizon faktorët dhe shkaqet kryesore që sjellin përshkallëzimin e konflikteve në familje në dhunë fizike kryesisht ndaj grave.

"Të tria rastet për të cilat jemi informuar nga mediat janë shumë të rënda. Ngjarjet lidhen me njëra-tjetrën dhe ato tregojnë se shoqëria shqiptare është ende në tranzicion, ku ende nuk kemi konsoliduar rolin e anëtarëve të familjes në familje. Nga një familje patriarkale ku dominonin burrat dhe figura e gruas, nënës, femrës ishte e nënshtruar, kemi kaluar në një fazë tjetër të zhvillimit të shoqërisë, në një shoqëri që bazohet te të drejtat e njeriut ku edhe femra përpiqet të zërë vendin dhe pozicionin e saj në shoqëri.

Rritja e rolit të femrës në familje e shoqëri dhe rritja e pavarësisë së saj, ka krijuar një ngërç në marrëdhëniet brenda familjes. Nga një shoqëri ku burri kishte superioritet edhe për shkak të traditës së trashëguar nga brezat, sot kemi një familje ku gruaja i qëndron në krah burrit. Ndryshimi i statusit dhe i rolit të burrit e gruas brenda familjes, mendohet se është një nga shkaqet që gjeneron dhunë në familje.

Një nga shkaqet e tjera që çon në konflikte të dhunshme brenda familjes, ku viktimat kryesisht janë gra, por edhe anëtarë të tjerë të familjes, është edhe masivizimi i përdorimit të substancave narkotike, të cilat përveç të rinjve po përfshijnë edhe moshën e mesme. Një tjetër arsye që këta individë, në kushte ekstreme, ndërmarrin veprime brutale siç ishte ajo e djegies së 31-vjeçares nga ish-bashkëshorti.

Një nga arsyet e tjera që ndikon në shtimin e rasteve të dhunës në familje është edhe kriza ekonomike, pamundësia e burrave kryefamiljarë për të gjetur një punë dhe për të siguruar të ardhura për familjen.

Kalimi nga një shoqëri patriarkale drejt një shoqërie liberale me bazën e të drejtave të njeriut mendoj se është arsyeja kryesore e konflikteve që arrijnë në dhunë fizike brenda familjes."

Në vlerësimin e sociologes, dhuna në familje nuk është thjesht një çështje që u përket institucioneve, por është një çështje e të gjithë shoqërisë.

"Mendoj se reagimi i institucioneve në rastet e denoncuara të dhunës ka qenë korrekt dhe grave të dhunuara u është ardhur në ndihmë qoftë me urdhra-mbrojtjeje apo edhe me ndihmë ekonomike dhe sociale. Problem mbetet mungesa e denoncimeve nga gratë e dhunuara sepse rastet që denoncohen e marrin mbështetjen. Gratë e kanë akoma shumë të vështirë të denoncojnë rastet e dhunës në familje dhe të kërkojnë urdhër-mbrojtjeje. Më shumë se rastet e denoncuara, shqetësim aktual mbeten rastet e fshehura, të paeskpozuara."

Gjatë tre muajve të fundit janë 25 kërkesa drejtuar gjykatës së Korçës për urdhra të menjëhershëm të mbrojtjes, nga të cilat gjykata ka pranuar 13 prej tyre.

Statistikat e Policisë për rastet e dhunës

Për periudhën 01.06.2024 deri më 31.08.2024 në rang qarku sipas nenit 130/a të Kodit Penal janë evidentuar 46 raste të dhunës në marrëdhëniet familjare me 46 autorë.
Sipas ligjit 9669 kanë kërkuar për t’u pajisur me urdhër-mbrojtjeje 68 shtetas. Komisariati i Policisë Korçë për të njëjtën periudhë sipas nenit 130/a ka evidentuar 18 raste, me 23 autorë.
Sipas Ligjit 9669 në 33 raste është kërkuar urdhër-mbrojtjeje./ CNA