web counter
LEXO PA REKLAMA!

SHKARKO APP

App Store
Google Play

E fundit!

x

Shqipëri, aftësimi i qyetarëve për të përdorur shërbimet elektronike

23 Janar 2023, 21:10, Sociale CNA
Shqipëri, aftësimi i qyetarëve për të përdorur
Foto ilustruese

Përdorimi i teknologjisë nga qytetarët për kryerjen e mjaft shërbimeve po njeh vit pas viti rritje në Shqipëri. Por ky proces po gjen vështirësi sidomos për banorët në zonat rurale, moshat e treta dhe personat me aftësi të kufizuara. Organizatat joqeveritare po nxisin kohët e fundit platforma që të aftësojnë dhe rrisin edukimin tek qytetarët për të përdorur shërbimet përmes internetit.

Aktivistë të shoqërisë civile po paraqesin në Gjirokastër me kategori të ndryshme të qytetarëve platformën “Përdor tekonologjinë - përmirëso demokracinë”.

Platforma është krijuar nga organizata “Altri” në kuadër të një projekti mbështetur nga qeveria zviceriane dhe synon aftësimin e qytetarëve dhe edukimin e tyre për shërbimet elektronike.

Elida Jata, kordinatore e projektit thotë se nevojat e qytetarëve për shërbime elektronike janë të mëdha dhe aftësimi i tyre bëhet i domosdoshëm.

“Duke u nisur nga nevoja që konstatuam që në fazën e konceptimit të inisiativës kur qyetarët, të paktën një pjësë e madhe e grupmoshës së tretë nuk ishin aspak të familjarizuar me përdorimin e intenetit. Po kështu kostatuam pabarazinë dixhitale në kuptimin e aksesit në interent që kanë qytetarët, një pjesë e të cilëve kanë akses të vazhdueshëm dhe një pjesë nuk kanë akses të vazhdueshëm në internet. Një fakt tjetër ishte që shumë platforma nuk janë përshtatur për personat me aftësi ndryshe dhe kjo e bën më të vështirë përdorimin prej tyre", thotë ajo.

Pas një përvoje në Qarkun e Durrësit veprimtarët e shoqërisë civile synojnë ta shtrijnë përfshirjen e tyre në edukimin e qytetarëve në 12 qarqet e vendit.

"Sa i përket trajnimit të qytetarëve ndoqëm dy mënyra atë të aftësimit të drejtëpërdrejtë dhe aftësimit përmes një platforme dhe aplikacioni. Vetëm në Qarkun e Durrësit mbi 400 qytetarë janë trajnuar drejtpërdrejtë në qendra apo laboratorë të aftësimit teknologjik për njohuri bazë në përdorimin e internetit dhe shërbimeve elektronike. Ndërsa për sa i përket aksesit në platformë kanë qenë mbi 3500 qytetarë që janë përfshirë dhe mbi 150 qytetarë të tjerë që janë certifikuar për njohuritë përmes platformës", thotë Elida Jata, kordinatore e projektit .

Sipas të dhënave të Institutit shqiptar të Statistikave, INSTAT, gjatë vitit 2022 të gjitha kategoritë e popullsisë për kontaktet elektronike përmes internetit me autoritetet publike në Shqipëri shënuan rritje.

Rritja më e lartë sipas INSTAT është shënuar për shkarkimin apo printimin e formularëve zyrtarë me rreth 37% krahasuar me vitin 2021, ndërkohë që marrja e informacionit nga faqet e aplikacioneve dhe internetit ka shënuar një rritje me mbi 19%.

Shërbimet që ofrohen përmes internetit janë të rëndësishme pasi u vijnë në ndihmë palëve ndërgjyqësore thotë për Zërin e Amerikës, Gentiana Lili në zyrën e informimit në Gjykatën e Gjirokastrës.

Ata informohen së pari për kalendarin e zhvillimit të seancave gjyqësore, për shortimin e cështjeve të ndryshme gjyqësore, por marrin informacion edhe për cështje të tjera përmes faqes së internetit të gjykatës.

Zonja Lili thotë më tej se Këshilli i Lartë Gjyqësor i ka dhënë përparësi shtimit të shërbimeve që mund të afrohen përmes portaleve të gjykatës.

"Këshilli i Lartë Gjyqësor ka miratuar planin e komunikimit për vitin 2022-2024 duke i dhënë përparësi shtimit të shërbimeve që mund të ofrohen përmes portaleve të gjykatës si dhe rritjen e aksesit në informacion duke parashikuar edhe krijimin e platformave të tjera dixhitale që kanë për qëllim të rrisin besimin dhe transparencën e gjyqësorit tek publiku", thotë ajo.

Qytetarët po shfaqin interes lidhur me platformat aftësuese dhe edukuese dhe përpjekjet duhet të vijojnë, thotë kordinatorja e Qendrës “Altri”, Elida Jata.

“Kjo duhet të vijojë të bëhet për të aftësuar sa më shumë qyetarë dhe për të ecur paralelisht me zhvillimet tekonlogjike apo proceset demokratike. Kjo edhe për të mos lënë qyetarët pas, duke bërë diferencimin që vetëm pjesa e qytetarëve që kanë njohuritë e nevojshme të aksesojnë këto platforma të mund të marrin shërbimet dixhitale , por të gjithë qytetarët në mënyrë të pandarë dhe pakategorizuar të kenë aksesin për informacionet dhe shërbimet bazë që u nevojiten", thotë ajo.

Vitin e shkuar qeveria shqiptare mbylli shërbimet në sportele dhe pjesa më e madhe e tyre kaluan përmes internetit duke paraqitur vështirësi për disa kategori të popullsisë sidomos në zonat rurale./ VOA





Lajmet e fundit nga