web counter
LEXO PA REKLAMA!

SHKARKO APP

App Store
Google Play

E fundit!

x

Humbi jetën pas 15 ditësh në koma/ Familjarët e 58-vjeçarit: Nuk ishte aksidentale, u godit nga një person

8 Shtator 2025, 12:34, Sociale CNA

Humbi jetën pas 15 ditësh në koma/ Familjarët e

Një 58-vjeçar nga fshati Rëmbec i Maliqit ka humbur jetën të dielën e 7 shtatorit në QSUT, pas 15 ditësh në gjendje kome. Viktima është Jorgo Ajredini, i cili më 13 gusht u dërgua fillimisht nga familjarët në spitalin e Korçës me plagë të rënda në kokë dhe më pas, për shkak të gjendjes së tij, u transportua drejt Tiranës. Ngjarja fillimisht u referua nga policia si aksidentale, me dyshimin se 58-vjeçari ishte goditur nga kali.

Por familjarët e tij kanë hedhur poshtë këtë version, duke pretenduar se Ajredini është goditur me sende të forta nga një person me të cilin kishte pasur konflikte të mëparshme. Ata tregojnë se viktima, para se të humbiste ndjenjat, u kishte thënë se ishte sulmuar nga një person nga Pogradeci, ndërsa sipas tyre, gjendja dhe plagët në disa pjesë të kokës nuk përputhen me një goditje aksidentale nga kafsha.

“Kam qenë në Rëmbec bashkë me vëllanë. U ndamë aty. E gjeta duke pirë ndonjë gotë te muzeumi, te klubi. Vëllai mori kalin dhe shkoi ta lidhte në jonxhë, unë ika në shtëpi. Vjen kushëriri, më zgjon dhe më thotë: 'Është goditur vëllai nga kali.' Shkuam 45 minuta para se ta nisnin në Tiranë. E pyeta vëllain dhe më tha: 'S’më ka goditur kali, por një person nga Pogradeci.' Shkova në Tiranë një ditë, të nesërmen e denoncova në Maliq. Çështja ishte shumë e rëndë. Ishte në gjendje kome, doktorët e ngritën lart, sepse ishte pak më mirë. 'Më goditi', tha vëllai, por s’qe i vetëdijshëm. Pastaj vajti prapë poshtë dhe e ngritën përsëri. Fundi ja ku është… Me pak fjalë e kanë goditur. Në vendin që duhej lidhur kali nuk ishte kali; ai duhej të ishte në jonxhë. Atij i bënë pritë. Kur tha 'më goditën' tha edhe “'një i shkurtër nga Pogradeci'. Këtë e tha vetë. Dua të vërtetën. Policia s’ka bërë asgjë”,-u shpreh Agustin Ajredini.

“Ngjarja ka ndodhur në fshatin Rëmbec të Korçës. E gjetën kushërinjtë tanë dhe e sollën në Korçë. U tha se e kishte goditur kali. Vëllain e gjetën të hedhur në kanal, në dy vende kishte gjak dhe 4-5 metra më larg gjetën vëllain. E sollën në Korçë. Në kohën që do ta çonin në Tiranë, vëllai tha që nuk e kishte goditur kali, por e kishte goditur një njeri nga Pogradeci. Doli gjak nga goja dhe nuk mundi të fliste dot më. Vetullën e kishte të çarë, pas veshit kishte goditje tjetër dhe në nofull gjithashtu. Kjo vërteton që nuk është goditje kali, sepse ka goditje në disa vende. Këta djemtë që kanë dhënë deklaratat ishin të parët që e gjetën. Ka pasur një konflikt me një djalë nga Rëmbeci, ai u dënua dhe bëri burg. Ishte punë dashurie, ndarje familjare. Vëllait tim ia mori të shoqen ky djalë dhe e goditi me sëpatë. Ngjarja ka mbi një vit e gjysmë. Nuk besoj të jetë i njëjti autor, por nga goditjet që pashë janë me sende të rënda, nga ato që pashë unë në spital në Tiranë. Në Tiranë ndenji 15 ditë në koma, mjekët thanë se ishte në gjendje të rëndë. Ekspertiza nuk na dha përgjigje ne, por prokurorisë së Korçës. Ne po e varrosim vëllain, por duam të zbardhet ngjarja. Nuk e ka goditur kali, 1000%”,- tha Ilia Ajredini.

Humbi jetën pas 15 ditësh në koma/ Familjarët e
Pamje nga vendi i ngjarjes

Dyshimet janë shtuar edhe nga dëshmia e dajës së viktimës, i cili thotë se mjeku që e trajtoi në Tiranë ka përjashtuar mundësinë që plagët të jenë shkaktuar nga goditje kali.

 “E çoi djali më përpara. Unë me vëllain e të ndjerit shkuam në Tiranë dhe nuk dinin identitetin e nipit tim. Ia dhanë relacionin, infermierët thirrën doktorin. Kur vjen doktori thotë: 'Çfarë u bë me këtë djalë? Çfarë e ke ti?' Unë i thashë: 'E kam nip. Ai e ka vëlla'. 'Si u aksidentua ky person?' tha doktori. Ishte e dyta herë që e kishin goditur këtë djalë; qëlloi i njëjti mjek që kishte qenë edhe herën tjetër kur e kishin goditur. Vëllai tha: 'Çfarë u bë këtu, kush e ka goditur?' Ne e informuam se policia e Korçës tha se e kishte goditur kali, por ai na tha se nuk e ka goditur kali, por është goditur me mjete të forta. U nxeh duke shtuar: 'Ku është policia e Korçës, pse nuk vjen këtu?' Ne i kërkuam ta shohim, por mjeku na tha: 'Nesër do t’ju kontaktoj.' Pas dy ditësh e pamë, ishte në gjendje të rëndë”,-tha Kostaq Kosturi.

Vdekja e Jorgo Ajredinit ka rihapur hetimet nga policia dhe prokuroria e Korçës. Deri tani janë marrë në pyetje rreth 15 persona, mes tyre familjarë dhe banorë të fshatit. Që nga dita e ngjarjes, janë sekuestruar edhe pamjet e kamerave të sigurisë që ndodheshin në zonë, të cilat po analizohen nga prokuroria. Grupi hetimor pritet të zbardhë përfundimisht nëse bëhet fjalë për një aksident apo një ngjarje kriminale, pasi të dalë raporti mjekoligjor./CNA





Lajmet e fundit nga