web counter
LEXO PA REKLAMA!

SHKARKO APP

App Store
Google Play

E fundit!

x

Bllokimi i rrugës Librazhd-Prrenjas rrit kostot për tregtarët e shumicës në Korçë

24 Shkurt 2026, 11:16, Sociale CNA

Bllokimi i njërit prej akseve kryesore rrugore, Librazhd-Prrenjas, po sjell pasoja të drejtpërdrejta për tregtarët e pikës së shumicës në Korçë. Ata thonë se devijimi i qarkullimit drejt rrugëve alternative ka rritur ndjeshëm kostot e transportit, duke ndikuar në çmimin përfundimar të produkteve.

Sipas tregtarëve, rruga në zonën e Gramshit është e pakalueshme për mjetet e tonazhit të rëndë, duke i detyruar ata të ndjekin itinerare më të gjata përmes Përmetit, me dalje në Tepelenë e më pas në Sarandë. Kjo ka zgjatur ndjeshëm kohën e furnizimit, nga rreth 3 orë në mbi 5 orë me furgon, ndërsa për kamionët edhe më tepër.

“Bllokimi i rrugës ndikon shumë te ne si tregtarë të mallit. Rriten çmimet nga kostoja që do të ketë transporti. Makina pëson dëme të shumta nga rruga shumë e keqe e Gramshit. Tani për momentin ne ndjekim rrugën e Përmetit sepse në Gramsh është shumë problematike rruga dhe me peshë nuk mund të vish. Rruga është shumë e gjatë, do dalësh në Tepelenë më pas në Sarandë, etj. Nga Saranda është rruga më e gjatë. Nëse në rrugë normale shkonim për 3 orë, tani nga Saranda me furgon shkon më tepër se 5 orë, kurse me kamion shkon akoma më shumë”,-shprehet një tregtar.  

Bllokimi i rrugës Librazhd-Prrenjas rrit kostot për tregtarët e

Përveç kohës, bizneset përballen me rritje të shpenzimeve për karburant dhe dëmtime të mjeteve për shkak të gjendjes së amortizuar të rrugëve, veçanërisht në segmentin e Lozhanit, ku prania e gropave e bën qarkullimin të vështirë.

"Kostoja është e shtuar nga nafta dhe makina, se mund të dëmtohet. Rruga e Lozhanit është shumë keq sepse është me gropa. Edhe nga e marrim do rritet çmimi, por edhe këtu që do ta shesim do ta rrisim çmimin. Nëse e shisnim mallim me 100 lekë të vjetër fitim, tani do ta shesim për 200 lekë të vjetër sepse shtohen kostot dhe nuk ia vlen",-thonë tregtarët.

Tregtarët paralajmërojnë se rritja e kostove po i detyron të shtojnë çmimet e produkteve për të përballuar shpenzimet, ndërsa nëse situata vijon, disa prej tyre mund të pezullojnë aktivitetin deri në hapjen e rrugës së Librazhdit. Sipas tyre, zgjatja e kësaj gjendjeje rrezikon jo vetëm bizneset e shumicës, por edhe konsumatorët, të cilët do të përballen me çmime më të larta.

"Nëse situata vazhdon kështu do ta mbyllim aktivitetin, do rrimë pushim sa të hapet rruga e Librazhdit. Nuk ia vlen sepse ne paguajmë edhe punëtorët. Sa më shumë kosto të kemi ne këtu, aq më shtrenjtë duhet të shitet malli, por kush e merr?",-shprehen tregtarët.

Bllokimi i rrugës Librazhd-Prrenjas rrit kostot për tregtarët e

Në pritje të një zgjidhjeje, tregtarët kërkojnë ndërhyrje të shpejtë për rikthimin e qarkullimit normal në këtë aks të rëndësishëm. Ata paralajmërojnë se çdo vonesë e mëtejshme do të thellojë vështirësitë ekonomike, duke rënduar zinxhirin e furnizimit dhe çmimet për konsumatorët në Korçë dhe zonat përreth./CNA





Lajmet e fundit nga