Pandemia e COVID-19/ Alimehmeti jep dy lajme të mira për shqiptarët

2 Shtator 2022, 12:10, Shëndeti CNA

Pandemia e COVID-19/ Alimehmeti jep dy lajme të mira për

Mjeku epidemiolog, Ilir Alimehmeti

Mjeku epidemiolog, Ilir Alimehmeti, ka dhënë dy lajme të mira për shqiptarët, në lidhje me pandeminë e COVID-19.

Me anë të një statusi në rrjetet sociale, Alimehmeti thotë se evidencat po tregojnë se varianti Omicron dhe imuniteti në rritje po e dërgon COVID-19 në nivelin e gripit.

Një lajm tjetër i mirë sipas mjekut, është se fëmijët, adoleshentët dhe moshat e reja kanë pasur më pak shtrim nga COVID-19 se sa nga gripi, pavarësisht varianteve në qarkullim dhe pavarësisht nëse janë vaksinuar apo jo.

Statusi i plotë i Alimehmetit:

Për të menduar qartë kërkohet kurajo, jo inteligjencë.”

Cit.: Prof. Dr. Thomas Szasz (Profesor i Psikiatrisë)

Dy lajme të mira miqtë e mi!

Së pari, evidencat po tregojnë se varianti Omicron së bashku me imunitetin në rritje dhe përmirësimin e trajtimit ka filluar ta çojë COVID-19 në nivelin e gripit për sa i përket formave të rënda spitalore!

Së dyti, evidentohet sërish se fëmijët, adoleshentët dhe moshat e reja kanë pasur më pak shtrim nga COVID-19 se sa nga gripi, pavarësisht varianteve në qarkullim dhe pavarësisht nëse janë vaksinuar apo jo!

Pandemia e COVID-19/ Alimehmeti jep dy lajme të mira për

Në mënyrë të veçantë, për panevojshmërinë e vaksinimit të fëmijëve, adoleshentëve dhe të rinjve kam advokuar dhe nxjerrë evidenca gjatë të gjithë pandemisë dhe evidencat vazhdojnë dhe konfirmojnë të njëjtat gjetje.

Vaksinimi i fëmijëve, adoleshentëve dhe i të rinjve të shëndetshëm nuk ka qenë i nevojshëm, aq më keq nëse ka qenë i detyruar!

CDC e British Columbia dhe Universiteti i British Columbia kanë studiuar dhe prepublikuar shtrimet në spital të të gjithë popullatës së British Columbia (Kanada) prej 5.3 milionë banorësh nga:

COVID-19,

gripi pandemik (sezoni 2009-2010),

gripi i sezonit 2015-2016, i cili ka qenë më i rëndë për moshat e reja, dhe

gripi i sezonit 2016-2017, i cili ka qenë më i rëndë për moshat e vjetra.

Përpara vaksinimit dhe variantit Omicron (Figura 1: sezoni 2020-2021), sipas moshës:

0-4 vjeç, COVID-19 ka shtruar në spital më pak fëmijë se sa çdo lloj gripi në studim;

5-11 vjeç, COVID-19 ka shtruar në spital më pak fëmijë se sa çdo lloj gripi në studim;

12-17 vjeç, COVID-19 ka shtruar në spital më pak adoleshentë se sa çdo lloj gripi në studim;

18-29 vjeç, COVID-19 ka shtruar në spital më pak të rinj se sa gripi pandemik;

30-69 vjeç, COVID-19 ka shtruar në spital më shumë persona se sa çdo lloj gripi në studim;

70 vjeç, COVID-19 ka shtruar në spital statistikisht po aq persona sa edhe gripi i 2016-2017 që ka qenë më i rëndë për moshat e vjetra, dhe më shumë persona se sa gripi pandemik. (Kujdes: këtu mund të kenë luajtur rol masat dhe ndërgjegjësimi i moshave të vjetra për t’u mbrojtur nga infektimi.)

E dhënë dytësore mbi kohëqëndrimin në spital (Tabela 3):

Moshat 0-49 vjeç kanë pasur të njëjtën kohëqëndrimi në spital në krahasim me çdo lloj gripi.

Moshat ≥50 vjeç e kanë pasur kohëqëndrimin në spital nga COVID-19 më të gjatë se sa gripi.

Por pyetjet e mëdha janë:

A jemi kthyer në normalitet?

A ka shkuar problematika e COVID-19 në nivelin e gripit tashmë?

Me sa vërehet në Figurën 2 përgjigja është PO!

Pandemia e COVID-19/ Alimehmeti jep dy lajme të mira për

Pa asnjë diferencë moshore, shtrimet në spital nga COVID-19 në periudhën janar-shkurt 2022 janë nën nivelin e gripeve me të cilat është krahasuar!

Nga vjen kjo situatë tashmë e zbutur? Kemi të paktën 4 faktorë:

Mbizotërimi i variantit Omicron, që e kemi parë të jetë më i butë se sa variantet e tjera.

Imuniteti natyror, pasi shumica dërrmuese e popullatës tashmë ka kaluar të paktën një infeksion nga SARS-CoV-2.

Imuniteti artificial i ofruar nga vaksininimi i moshave të mëdha dhe i të sëmurëve.

Përmirësimi i njohjes së sëmundjes dhe i trajtimit të saj në fazat e hershme virale.

Kujdes kur interpretohet Figura 1.

Në atë periudhë është e vërtetë që personat kanë qenë të pavaksinuar, por kishte edhe masa të rrepta publike (shpesh të ekzagjeruara, sidomos në Kanada), që mund të ketë mbajtur numrin e shtrimeve më ulët te moshat e vjetra.

Por, siç tregon edhe Figura 1 edhe Figura 2, për fëmijët, adoleshentët dhe të rinjtë, COVID-19 nuk ka qenë kurrë një problem as në nivelin e gripit, as përpara vaksinimeve të panevojshme të moshave të reja dhe as kur qarkullonin variante më agresive se varianti Omikron.

Autorët përfundojnë se:

Te të rriturit, në kohën kur kishte më shumë kufizime dhe shumica ishin të pavaksinuar, shtrimet në spital nga COVID-19 ishin më të larta se sa gripi, por në kohën e Omicronit, kur shumica ishin të vaksinuar dhe kishte më pak masa në fuqi, niveli i shtrimeve spitalore ishte në nivel të krahasueshëm (të njëjtë).

Gripi ka pasur një impakt më të lartë se sa COVID-19 ndër moshat <18 vjeç, pavarësisht nga gjendja e vaksinimit apo nga varianti që ka qenë në qarkullim./ B.A. - CNA.al