Elzbieta Loska, guidatorja turistike nga Polonia prej 10 vitesh në Sarandë

9 Mars 2025, 14:17, Qyteti im CNA

Elzbieta Loska, guidatorja turistike nga Polonia prej 10 vitesh në

Erdhi nga Polonia për dy javë si turiste në Sarandë dhe i lindi dashuria për këtë qytet me shikim të parë. Eshtë polakja Elzbieta Loska, e cila prej 10 vitesh udhëheq guidën turistike të polakëve në këtë qytet. Gjatë rrugëtimit të saj prej 10 vitesh Elzbieta ka mësuar edhe gjuhën shqipe.

“Për herë të parë në vitin 2025, udhëtova vetëm për pushime. Shqipëria nuk njihej shumë në Poloni, por unë dëshiroja ta vizitoja pas shikimit të plazheve të bukura në internet. E realizova ëndrrën time, duke kaluar nga Greqia, dhe u dashurova shpejt me këtë vend”, tha polakja.

E ndikuar nga opinioni publik ajo ishte e stepur për shqiptarët, por kur udhëtoi nga Korfuzi drejt Sarandës iu tha dhe miqve të saj se Shqipëria është e kundërta e asaj që dimë. Vendosi të jetojë në Sarandë duke udhëhequr turistët polakë nëpër atraksionet e rajonit të jugut nga Saranda, Butrinti, Syri i Kaltër dhe Gjirokastra.

“Një mik i imi këtu më tha të provoj të jetoj në Shqipëri. Kalova dy javë pushime dhe më pas u ktheva përfundimisht. Gjeta një universitet për të mësuar gjuhën shqipe dhe fillova një kapitull të ri në jetë”, deklaron Elzbieta.

Tashmë Elzbieta e ka zgjeruar aktivitetin e saj duke bashkëpunuar me vendasit për t’u përqendruar edhe në tregun imobiliar, për të gjithë ata polakë, të cilët janë të interesuar të investojnë në pasuri të paluajtshme.

“Më pas, fillova të promovoj për Shqipërinë dhe Sarandën, për të luftuar paragjykimet negative që kishin polakët për këtë vend. Përpiqesha t’u tregoj se Shqipëria ka shumë më shumë për të ofruar, jo vetëm det, por edhe male dhe histori të pasur”, tha ajo.

Në Sarandë numerohen rreth 20 subjekte private në pronësi të shtetasve të huaj të cilët pasi kanë vizituar qytetin si turistë kanë zhvilluar këto aktivitete ekonomike në fushën e turizmit, agjensi imobiliare, bare dhe restorante, sipërmarrje për menaxhim të strukturave hoteliere në Sarandë dhe Ksamil.

“Kam marrë licencën si guidë turistike dhe tani shoqëroj turistët në vende të tilla si Butrint, Gjirokastër dhe Syri i Kaltër. Dëshiroj që turistët të kuptojnë se Shqipëria është një vend me shumë pasuri natyrore dhe historike, jo vetëm për detin qe ka. Kam ndihmuar shumë polakë të gjejnë shtëpi këtu, duke ua bërë më të lehtë integrimin në Shqipëri dhe duke u ofruar mbështetje për vendet ku mund të jetojnë”, u shpreh guiderja polake./ CNA