"Tregohuni se çfarë sistemi zgjedhor ka Gjermania"/ Murrizi thirrje eurodeputetëve

4 Mars 2026, 19:31, Politikë CNA

"Tregohuni se çfarë sistemi zgjedhor ka Gjermania"/

Ish-deputeti Myslim Murrizi ka reaguar në rrjetet sociale lidhur me reformën zgjedhore, duke marrë si shembull modelin e Gjermanisë dhe duke iu drejtuar drejtpërdrejt eurodeputetëve McAllister dhe Krichbaum.

Murrizi thotë se në Gjermani deputetët zgjidhen nga qytetarët me lista të hapura dhe jo përmes listave të mbyllura të hartuar nga kryetarët e partive. Sipas tij, ky sistem garanton përfaqësim të drejtpërdrejtë dhe forcon sovranitetin e votës së qytetarëve.

Duke iu referuar reformës zgjedhore në Shqipëri, sipas tij, procesi po menaxhohet nga Rama dhe Berisha. Ai shprehet se sistemi aktual u jep kryetarëve të partive kontroll mbi përbërjen e Kuvendit dhe kërkon miratimin e listave 100% të hapura, si dhe shpalljen e Shqipërisë një zonë të vetme zgjedhore.

Në mesazhin e tij, Murrizi u bën thirrje McAllister dhe Krichbaum që, gjatë vizitave në Shqipëri, të sqarojnë publikisht modelin zgjedhor të Gjermanisë dhe mënyrën se si zgjidhen deputetët atje.

Reagimi i Murrizit

Të nderuar z. Mekalister dhe z. Krichbaum,

Kjo është fleta e votimit në vendin tuaj, Gjermani.

Pra, gjermanët zgjedhin me votë deputetët e tyre dhe nuk votojnë listën e kryetarëve të mbushur me njerëz pa asnjë vlerë. Gjermania ka një ligj zgjedhor me lista të hapura dhe çdo qytetar zgjedh atë që mendon se e përfaqëson më mirë.

Prandaj, kur vini për vizitë në Shqipëri dhe shtrëngoni në qafë apo puthni deputetë shqiptarë që i keni për zemër, mirë është t’u tregoni se çfarë sistemi zgjedhor ka Gjermania dhe si zgjidhen deputetët në vendin tuaj, që çifti i bashkëkryetarëve të komisionit për reformën zgjedhore PS–PD të mos flasin sikur po shpikin armë bërthamore.

Gjithashtu, as Rama dhe as Berisha të mos kenë mundësi të jenë “pronarë” të Parlamentit, duke qenë padrino të partive politike militantiste, sepse me lista të hapura asnjëri prej tyre nuk do të kishte rreth vetes servilë që kërkojnë favore apo dalin në fotografi.

Madje, z. Mekalister e di mirë çfarë do të thotë votë me listë të hapur, sepse e ka provuar vetë: edhe pse ish-kancelarja Angela Merkel e kishte të preferuar, qytetarët gjermanë nuk e votuan në vitin 2013 dhe prej 13 vitesh nuk është më deputet në Bundestag. Në vitin 2014 u përfshi në listën e mbyllur të partisë për të qenë eurodeputet.

Prandaj, deklaratat si “liderë të mëdhenj” apo “të votuar nga populli” mund t’ua shisni atyre që ju kërkojnë një foto.

Ligji që rikthen demokracinë dhe sovranitetin e votës së qytetarëve, që u cenua nga marrëveshja e prillit 2008 mes Ramës dhe Berishës, është: lista 100% të hapura dhe Shqipëria një zonë e vetme zgjedhore.

Diskutimet për financimin e partive apo propozimet për 30% lista të mbyllura janë përpjekje për të ruajtur karrigen në Kuvend pa votë reale dhe për t’u shërbyer kryetarëve të partive.