web counter
LEXO PA REKLAMA!

SHKARKO APP

App Store
Google Play

Marrëveshja për gazin/ Rama: Vlora kthehet në një pikë kritike për energjinë në Europën Juglindore

28 Prill 2026, 14:52, Politikë CNA

Marrëveshja për gazin/ Rama: Vlora kthehet në një pikë

Kryeministri Edi Rama ka mbajtur fjalën e tij në ceremoninë e nënshkrimit të marrëveshjes për sigurinë energjetike mes Shqipërisë, SHBA-së dhe Greqisë.

Rama u shpreh se energjia përcakton fuqinë ekonomike të vendit dhe shtoi se Shqipëria synon që brenda këtij mandati të kthehet në një vend eksportues neto të energjisë.

Ndër të tjera, u shpreh se me këtë marrëveshje, Vlora kthehet në një pikë kritike për energjinë në Europën Juglindore.

“Ka qenë një moment në jetën tonë kur energjia ishte çështje furnizimi, për të mbajtur dritat ndezur sa më gjatë të ishte e mundur në harkun e 24 orëve. Nga ana tjetër, jetonim në një vend ku, deri një dekadë më parë, gjysma e popullsisë paguante për gjysmën tjetër, ndërkohë që e gjithë pasuria e prodhuar nga sistemi ynë ishte, në fakt, e keqmenaxhuar dhe e vjedhur.

OSHEE, deri një dekadë më parë, ishte në buzë të falimentit dhe mbahej gjallë nga subvencionet qeveritare. Borxhi ishte më shumë se 5% e PBB-së. Sot, energjia përcakton sigurinë tonë, fuqinë tonë ekonomike dhe ambicien për vendin që zë në rajon dhe në Europë: të arrijmë që, brenda këtij mandati, të shndërrohemi në një vend eksportues neto të energjisë. Një element kyç i këtij rrugëtimi është partneriteti me SHBA-në, që mbështetet në zotimin e përbashkët ndaj sigurisë energjetike.

Vlora do të kthehet në një pikë kritike për energjinë në Europën Juglindore. Theksoj rëndësinë e asaj që tha ambasadorja Guilfoyle, për nevojën tonë, të Greqisë dhe të Shqipërisë, për të forcuar lidhjen dhe bashkëpunimin në shumë mënyra, por posaçërisht sa i takon furnizimit me energji, prodhimit, rezistencës dhe pavarësisë. Partneriteti i Shqipërisë dhe SHBA-së përçon një mesazh: edhe vendet e vogla mund të marrin hapa të guximshëm dhe të bëhen pjesë e zgjidhjes së sfidave më të ngutshme të kohëve tona. Edhe më shumë se kaq, mesazhi sot nuk mund të jetë më i qartë kur vjen fjala për të lidhur nevojën jetike për energji me nevojën për liri dhe demokraci: për të mos u mbështetur tek aktorë që të ofrojnë energji, por mund të të vënë në pozitë të vështirë me lirinë dhe objektivin për të forcuar demokracinë. Dua të theksoj rëndësinë e kësaj marrëveshjeje. Dua të përgëzoj ekipin tonë për shpejtësinë e pazakontë për realizimin e saj; ishte edhe nën trysninë time”, tha Rama. /CNA





Lajmet e fundit nga