web counter
LEXO PA REKLAMA!

SHKARKO APP

App Store
Google Play

E fundit!

x

Manastirliu, thirrje të rinjve nga Kamza/ “Zgjidhni zanatin, sukses i garantuar në tregun e punës”

6 Dhjetor 2023, 13:31, Politikë CNA
Manastirliu, thirrje të rinjve nga Kamza/ “Zgjidhni zanatin, sukses i
Ministrja e Arsimit dhe Sportit, Ogerta Manastirliu

Fushata e Ministrisë së Arsimit dhe Sportit, “Zgjidh Zanatin”, ka vijuar me nxënës, prindër dhe mësues në Kamëz.

Ministrja e Arsimit dhe Sportit, Ogerta Manastirliu, bashkë me kryetaren e Kuvendit, Lindita Nikolla, dhe kryetarin e Bashkisë Kamëz, Rakip Suli, kanë marrë pjesë në aktivitetin e organizuar në shkollën 9-vjeçare të rindërtuar, "Lidhja e Prizrenit” në Kamëz, për promovimin e arsimit profesional, me nxënës, prindër, mësues, përfaqësues të biznesit, etj.

Ministrja u ka bërë thirrje të gjithë nxënësve dhe prindërve të ndërgjegjësohen për orientimin drejt arsimit profesional, për një të ardhme të sigurt për të rinjtë, për t’u integruar në tregun e punës.

"Unë dua të inkuraroj të rinjtë e kësaj shkolle, ashtu sikurse dua të inkurajoj të rinjtë dhe prindërit e Kamzës, mësuesit gjithashtu, që t'i përdorin këto instrumente që kemi për të gjurmuar talentet dhe prirjet e nxënësve dhe për t'i orientuar ata drejt arsimit profesional. Të mirat e arsimit profesional janë jo vetëm të prekshme, por sot po bëhet edhe një nevojë e madhe kombëtare. Për t’ju përgjigjur zhvillimit ekonomik dhe social të vendit, për t’iu përgjigjur nevojave të tregut të punës, ne duhet të jemi të fokusuar te ndërgjegjësimi i çdo të riu për rëndësinë që ka të paturit të një zanati",- tha ministrja Manastirliu.

Duke folur për transferimet nga gjimnazet në shkollat profesionale ministrja Manastirliu, bëri me dije se falë mekanizmave të krijuar dhe fushatës intensive të komunikimit me nxënësit në këta dy muaj, janë transferuar drejt arsimit profesional edhe nxënës me rezultate të larta.

"Në 2 muaj janë transferuar rreth 200 nxënës të shkollave të ndryshme të vendit, të klasave të 10-ta, drejt arsimit profesional. Nuk janë vetëm ata me arritje dhe rezultate modeste, por edhe ata që kanë rezultate të larta, të cilët po vijojnë arsimin profesional, me dëshirën për të thelluar studimet e tyre drejt arsimit të lartë, por edhe me dëshirën për të pasur një profesion që në një moshë të re", - tha ministrja Manastirliu.

Deri në fund të muajit dhjetor, nxënësit e klasave të 10-ta, që duan të zgjedhin një zanat, mund të transferohen nëpërmjet e-Albania-s nga gjimnazi në shkollat profesionale. Në shkollën "Lidhja e Prizrenit" në Kamëz, është mirëpritur fushata "Zgjidh zanatin" nga mësuesit, nxënësit dhe prindërit, për orientimin drejt arsimit profesional, fushatë e MAS, e cila do të vijojë në të gjithë vendin./ CNA





Lajmet e fundit nga