web counter
LEXO PA REKLAMA!

SHKARKO APP

App Store
Google Play

E fundit!

x

Integrimi në BE/ Analisti Gjeta: Duhet analizuar sa e gatshme është Shqipëria të anëtarësohet pa të drejtë vetoje ose vote

22 Tetor 2025, 20:54, Politikë CNA
Integrimi në BE/ Analisti Gjeta: Duhet analizuar sa e gatshme
Altin Gjeta

Analisti dhe pedagogu në Universitetin e Birminghamit në Britaninë e Madhe, Altin Gjeta ka folur për CNA TV lidhur me procesin e integrimit të rajonit të Ballkanit Perëndimor në Bashkimin Evropian. I pyetur nëse ka një qasje të re të BE ndaj Ballkanit Perëndimor, Gjeta është shprehur aktualisht ka një vullnet politik për një integrim të përshpejtuar të Malit të Zi dhe Shqipërisë në BE.

Analisti tha se zgjerimi ka qenë një ndër politikat të susksesshme të Bashkimit Evropian në 30-40 vitet e fundit dhe shtoi se dy këto dy shtete mund të anëtarësohen në BE brenda një periudhë 5 ose 7 vjeçare pavarësisht problemeve me korrupsionin, krimin e organizuar apo institucionet demokratike.

Duke u ndalur të anëtarësimi, Gjeta theksoi se rasti i Shqipërisë duhet analizuar me kujdes për të parë sa i gatshëm është vendi ynë të bëhet pjesë e BE, por pa pasur të drejtë vetoje ose votimi.

“Mendoj që në momentin që flasim, ka një vullnet politik në nivele të larta për një integrim të përshpejtuar të Malit të Zi dhe të Shqipërisë në Bashkimin Evropian. Kjo për shkak se në një kontekst ku vetë BE-ja shikohet si i sëmuri gjeopolitik i botës, Brukseli kërkon një sukses. Dhe zgjerimi ka qenë një ndër politikat më të suksesshme të Bashkimit Evropian në 30-40 vitet e fundit. Dhe në këtë moment që flasim, mendoj që ka një dritare mundësie reale që Shqipëria dhe Mali i Zi t'i bashkohen Bashkimit Evropian në një periudhë pesë apo shtatë vjeçare, pavarësisht problemeve që mund të kenë me korrupsionin, krimin e organizuar, institucionet demokratike.

Dhe në fakt kjo ka qenë një lloj hipokrizie me të cilën Bashkimi Evropian e ka trajtuar Ballkanin Perëndimor në tërësi, sepse asnjë nga vendet e Evropës Qendrore Lindore nuk i ka plotësuar krejtësisht kriteret. Edhe mendoj që ky është një moment i mirë për Shqipërinë, për Malin e Zi, veçanërisht, edhe është një dritare mundësie e cila duhet të shfrytëzohet, por duhen parë edhe mekanizmat të cilat do të vendosnin në punë Bashkimi Evropian për t'i integruar këto dy vende në familjen evropiane. Sepse kohët e fundit është folur shpesh, për shembull, për mundësinë e integrimit të vendeve të reja në BE, jo vetëm atyre të Ballkanit Perëndimor, por edhe Ukrainën, Moldavinë dhe Gjeorgjinë, të cilat janë vende aspirante dhe dy prej tyre madje kanë hapur negociatat, në një format krejt të ri ku këto vende nuk do të kishin të drejtën e votës në institucionet qendrore evropiane apo të drejtën e vetos.

Por duhet analizuar me kujdes, do të thoja unë, rasti i Shqipërisë, se sa të gatshëm jemi ne të bëhemi pjesë e një mekanizmi sui generis ndërkombëtar, siç është Bashkimi Evropian, pa pasur zë të plotë në vendimmarrjen e vet. Pra rrezikojmë që në një farë mënyre të humbasim vetëqeverisjen. Edhe mendoj që duhet një analizë jashtëzakonisht e kujdesshme, një lloj vizioni politik për të vlerësuar se kush janë përfitimet dhe humbjet. Megjithëse ne si popull, por dhe si vend, kemi treguar që jemi një ndër shtetet të cilat e mbështet më së shumti integrimin e vendit në Bashkimin Evropian”, u shpreh Gjeta. /CNA





Lajmet e fundit nga