Sulmet Lapaj-Shabani/ Bushati: Më të lumturit duhet të jenë Rama dhe Berisha

17 Korrik 2025, 22:10, Politikë CNA

Sulmet Lapaj-Shabani/ Bushati: Më të lumturit duhet të jenë

Analisti Andi Bushati komentoi sot lidhur me sulmet e ashpra mes dy bashkëdrejtuesve të koalicionit Nisma “Shqipëria Bëhet”, Adriatik Lapaj dhe Endrit Shabani.

I ftuar në një emision televiziv, Bushati u shpreh se nga e gjithë kjo situatë, më të lumturit duhet të jenë Edi Rama dhe Sali Berisha, si dy drejtuesit e dy partive më të mëdha në vend.

Bushati tha se e gjithë fabula në këtë situatë është te mungesa e thelbit të një lëvizje politike dhe prandaj pati këtë përfundim.

“Në fillim ideja për të kapërcyer listat e mbyllura, që pati Shqipëria Bëhet, nuk qe e keqe. Në parim duhej gjetur një metodë që hidhte poshtë fabulën e mollëve që thoshte Shabani. Zgjidhja që gjetën, ishte më e gabuara, e kemi diskutuar edhe këtu. Konstatimi i problemit të listave të mbyllura, që e mirë por mënyra si donin ta anashkalonin ishte e keqe. Lëvizja Bashkë dhe Arlind Qori kishin tjetër ide. Thoshin edhe nëse e bën këtë, nuk bëhet me daja dhe teze, por bëhet me anëtarë të partisë tënde, njerëz që ndajnë të njëjtin botëkuptim dhe filozofi politike. Fakti që merr hallën dhe xhajën, tregon që ti i kërkon elektoratit besim, por nuk ke besim te njerëzit e tu, përveç njerëzve tribal të farefisit, kjo duhet ti humbiste pikë.

Çfarë na tregon ne kjo fabul?

E para, njerëzit më të lumtur, duhet të jenë Rama dhe Berisha, sepse është folur gjatë e gjatë që këta janë të vjetrit, të rinjtë i tregojnë si politikanë të së shkuarës, por nëse nxjerrim që kjo është filozofia e partive të reja, them se Rama dhe Berisha duhet të jenë të gëzuar. Duhet të jenë të gëzuar edhe Lëvizja Bashkë, që i kemi sfilitur duke u thënë, pse nuk bashkoheni, por Qori thoshte nuk bashkohem dot me njerëz që nuk ndaj të njejtat ideale dhe vizion dhe që shumë shpejt do të shihni se si do të përlahen me njëri tjetrin. Kjo fabul e kalon thjesht fabulën e dajës së Endrit dhe zemërimit të Adriatikut. Duhet të na bëjë të reflektojë, se çfarë ardhmërie duhet të ketë politka jonë kur zhvillohet me këto kulisa.

Ne e shohim si një dajë që del papritmas, por pavarësisht se ishte partia më e votuar nga të rejat, ishte partia më pa bosht. Ti e di çfarë përfaqëson Lëvizja Bashkë, në qëndrime dhe program. Po kështu edhe Mundësia, se çfarë përfaqëson për tregun, taksimin, TVSH. Por Shqipëria Bëhet, ishte një amalgamë për të kapur vende deputetësh, jo një parti me program të qartë, me vizion për shoqërinë. Këto parti që nuk përmblidhen rreth një boshti, e kanë shumë më të kollajtë të shkërmoqen që në krizën e parë.

Kjo që ndodhi nuk është thjesht një dajë që del aksidentalisht, por mungesa e thelbit të një lëvizje politike dhe prandaj pati këtë përfundim”,-tha Bushati./CNA