Amnistria fiskale/ Tabaku: Komisioni Europian i ka kërkuar qeverisë të tërhiqet

11 Dhjetor 2025, 20:50, Politikë CNA

Amnistria fiskale/ Tabaku: Komisioni Europian i ka kërkuar qeverisë

Deputetja demokrate Jorida Tabaku ka deklaruar sot se Komisioni Europian i ka dërguar qeverisë shqiptare komente zyrtare dhe i ka kërkuar të tërhiqet nga nisma për “paqen fiskale” dhe marrëveshjet fiskale.

Ajo e cilësoi projektligjin një nismë të lobuar dhe të sponsorizuar, e hartuar sipas saj për interesat e një grupi të caktuar kompanish që synojnë të legalizojnë fitimet e tyre. Sipas deputetes demokrate, ligji është antikushtetues, krijon hapësira për pastrimin e parave, cenon konkurrencën e ndershme dhe dekurajon pagesën e taksave në të ardhmen.

Tabaku kërkoi transparencë të plotë nga Ministria e Financave, duke bërë publike listën e subjekteve që përfitojnë faljen e borxheve dhe çdo marrëveshje të lidhur me paqen fiskale.

Deputetja shtoi se opozita ka përgatitur disa amendamente për të kufizuar dëmin që sipas saj shkakton kjo nismë, në rast se qeveria nuk tërhiqet. Tabaku e cilësoi këtë vetëm njërin prej 17 ligjeve të lobuara dhe të sponsorizuara në Parlament, të cilat sipas saj rrezikojnë procesin e integrimit europian dhe detyrimet e Shqipërisë për luftën kundër pastrimit të parave.

“E nisëm ditën sot me një deklaratë të dhomës amerikane të tregtisë për tërheqjen e qeverisë nga ligji i paqes fiskale dhe i marrëveshjes fiskale. Isha në Bruksel këto dy ditë ku në takime me komisionin, me përgjegjësi të plotë ju them që komisioni i ka dërguar qeverisë shqiptare komente për ligjin dhe i ka kërkuar qeverisë shqiptare që të tërhiqet.

Ligji i paqes fiskale është një ligj i lobuar, është një ligj i sponsorizuar, është një ligj i cili bëhet për interes të disa kompanive të caktuara që duan të legalizojnë fitimet e tyre. Përveç se është antikushtetues, hap një rrugë për pastrimin e parave, cënon konkurrencën, por nga ana tjetër dekurajon edhe pagimin e taksave në të ardhmen.

I kemi kërkuar ministrit të na bëjë publike një listë edhe atyre që i falen borxhet por njëkohësisht edhe të marrëveshjeve për paqen fiskale që sigurisht do të jenë të ardhshme dhe nuk kemi pasur transparencë. Në këto kushte ne do të kërkojmë që ky të tërhiqet. Në qoftë se ligji nuk tërhiqet ne kemi përgatitur dhe disa amendamente për t'u përpjekur për ta kufizuar dëmin që ky ligj shkakton, por ky është një nga 17 ligjet që në këtë parlament janë ligje të lobuara dhe të sponsorizuara dhe cënon rëndë jo vetëm procesin e integrimit por njëkohësisht edhe të gjitha detyrimet për pastrimin e parave”, tha Tabaku.