web counter
LEXO PA REKLAMA!

SHKARKO APP

App Store
Google Play

Akuza e fortë e Berishës: Drejtorët e policive po i zgjedh klani i Troplinit dhe i Bajrajve

11 Nëntor 2024, 14:01, Politikë CNA
Akuza e fortë e Berishës: Drejtorët e policive po i zgjedh klani
Kreu i PD-së Sali Berisha

Kreu i PD-së, Sali Berisha, ka hedhur akuza të forta në lidhje me përzgjedhjen e drejtorëve të policisë në qarqe.

Në një deklaratë për mediat, Berisha u shpreh se drejtorët po zgjidhen nga klani i Troplinit dhe i Bajrajve.

“Së pari më lejoni të informoj shqiptarët se deklarata ime për organizatë kriminale bazohet në dokumente zyrtare, të cilat dëshmojnë se prokurorët dhe anëtarët e BKH-së, të SPAK-ut të partisë tregtojnë ditë e natë me dosjet e krimit, me autorët e krimeve. U vendosin gjoba të mëdha për të ndryshuar provat dhe lehtësuar veprën penale. Pra, unë nuk mund të lëshoj kurrë një akuzë që nuk qëndron, por unë me dokumente të tilla para, nuk mund të hesht kurrë.

Aty kemi të bëjmë me një organizatë të marrë peng nga Edi Rama, të lidhur në krim njëri me tjetrin. Po e përsëris edhe njëherë, kur Altin Dumani i kërkoi gjobëvënësit (atë dokument që e ka ai, e kam edhe unë) llogari se çfarë është kjo, gjobëvënësi ia ktheu, na shpjego pak zotëri, në 19 pyetje të Imer Lalës, të denoncuar nga Luftar Reçi për vrasje, si nuk pati asnjë pyetje për vrasje zotrote dhe si doli i ekzoneruar Lala nga vrasja?

Pra, më thoni ju mua, a nuk janë këta bashkëpunëtorë në krime? A nuk është bashkëpunëtor në krim Vath Staka, anëtar i KLP-së, i cili me urdhër të Taulant Ballës, me dokumente të vërtetuara, shkon dhe liron dy terroristë që donin të hidhnin në erë Lulzim Kullën, që unë nuk e njoh dhe nuk di se çfarë është? Dhe që Altin Lala apo Altin Dumani e ka të qartë siç e kam unë, por nuk guxon dhe hesht si kriminel, si tinëzar. A nuk është kriminel Taulant Balla, i cili me urdhër të Çelëve urdhëron Vath Stakën për t’i liruar ata?

Këta janë organizatë kriminale. Unë nuk them se secili prej tyre është, por këta janë drejtuesit. Kur Taulant Balla del në regjistrime se akuzohet për porositës vrasjesh dhe prokurori dhe gjykatësi urdhërojnë shkatërrimin e regjistrimit se nuk e dimë cili Taulant është, a nuk është kjo vepër kriminale? Taulant Balla u thotë, vendosni revolen në oborrin e Manahasëve dhe del Nuredini, nuk e ka dhënë Taulanti atë porosi.

Pra, çfarë janë këto? Njerëzit kanë të drejtë se shohin prokurorë specialë, prokurori speciale, të vetëkuptuar për të luftuar krimin, por e vërteta është se këta janë bashkëpunëtorë në krim. A e dini se çfarë po ndodh këto ditë? Kush po i përzgjedh drejtorët e policisë? Drejtorët e policive po i zgjedh klani i Troplinit dhe i Bajrëve.

Klani i Troplinit ka emëruar Neritan Nallbatin, Neritan Xibrakën, ish-bashkëpunëtorin e Hakmarrjes për Drejtësi, të nxjerrë nga Igli Toska nga policia e shtetit për bashkëpunëtor me këtë organizatë, për nxjerrje të sekretit te kjo organizatë.

A e dini ju se Ervin Toplini, ka përzgjedhur pasi mori Ilir Prodën e krimit, përfaqësuesin e bandave të Elbasanit drejtor policie, tani zgjedh Nallbatin për të zgjedhur drejtorët e policisë. A nuk janë këta organizatë kriminale? Këta janë edhe më të ligj se ata që rrinë në ilegalitet.

Shumë më të ligj, se këta kanë pushtuar zyrat e shtetit, përdorin paratë e shtetit, janë kryekëput në shërbim të tyre. Cila drejtësi, më thoni ju mua?

Kush e bëri drejtësinë? E bëri Xhorxh Sorosi. Janë me dokumente këto. Nuk është një shpikje e imja. Ai e shkatërroi drejtësinë me ambasadorë të korruptuar, me lotimin e tyre të korruptuar, natyrisht me Edi Ramën, pa Edi Ramën nuk bëhej kurrë ajo.

Nuk ka nevojë të flas unë, drejtësia flet vetë për veten e vet.

Po Olsi Çela në sa dosje e ka emrin? Çfarë është Olsi Çela? Është prokuror i përgjithshëm, por është prokuror i dosjes së Xibrakës, dosjes së Olsi Ramës, ndaj u shpërblye. Ndaj Olsi Çela mbron Irenën me 5 mbiemra, bashkë me Altin Dumanin e mbrojnë kriminelen që fsheh krimin.

A nuk janë këta organizatë kriminale? Nëse unë e kam gabim çdo njeri mund të thotë.

Ky është produkt i antireformës që u krye në Shqipëri mbi baza korrupsioni që kishte një qëllim, të konsolidonte narkoshtetin dhe të zhdukte opozitën. Ky ishte qëllimi”, u shpreh Berisha./ CNA





Lajmet e fundit nga