"47 miliardë lekë nuk mjaftojnë për qeverisje vendore efektive"/ Qosja kërkon fond të posaçëm për bashkitë rurale

26 Nëntor 2025, 12:47, Politikë CNA

"47 miliardë lekë nuk mjaftojnë për qeverisje vendore

Presidenti i Shoqatës së të Zgjedhurve Vendorë, Fisnik Qosja, ka paraqitur në Komisionin e Ekonomisë kërkesën për financim më të lartë për pushtetin e vetëqeverisjes vendore gjatë vitit 2026.

Qosja deklaroi se edhe pse parashikohet një rritje e financimit kjo nuk u përgjigjet e nevojave të pushtetit të vetëqeverisjes vendore. Ai gjithashtu tha se 47 miliardë lekë përfshinin kryesisht politikat e pagave dhe detyrimet ligjore, por jo rritje të vërtetë të kapaciteteve për një qeverisje efektive.

"Pushteti lokal ekziston për t’iu përgjigjur nevojave të qytetarëve aty ku preken shërbimet e tyre të përditshme. Të gjithë kryetarët e bashkive dhe administrata lokale janë pranë njerëzve dhe përgjegjësia jonë është shumë e madhe për shkak edhe të përgjegjësisë sonë më të lartë për të ofruar këto shërbime në mënyrë cilësore dhe të barabartë në të gjithë territorin. Prandaj bashkitë kanë nevojë për financim të qëndrueshëm dhe të lidhur realisht me kostot për detyrat që u janë deleguar. Edhe pse buxheti parashikon rritje nuk u përgjigjet e nevojave të pushtetit të vetëqeverisjes vendore.

Zonat rurale dhe malore me popullsi të shpërndara po përballen me kosto të rritura shërbimesh, ndërkohë që burimet financiare nuk po ecin me të njëjtin ritëm.

Transferta e pakushtëzuar prej 47 miliardë lekësh përfshin kryesisht politikat e pagave dhe detyrimet ligjore, por jo rritje të vërtetë të kapaciteteve për një qeverisje efektive. Formula aktuale e financimit nuk pasqyron kostot reale te funksioneve të decentralizuara.

Bashkitë mbajnë mbi supe infrastrukturë që kërkon mirëmbajtje të vazhdueshme, shërbime dhe komunitete të shpërndara."

Kryebashkiaku i Kavajës parashtroi disa kërkesa ku kërkoi dyfishim të ofertës për arsimin dhe shërbimet sociale si dhe krijimin e një fondi të veçantë për bashkitë rurale.

Kërkesat tona janë të qarta dhe të bazuara në analiza reale:

"Së pari: Dyfishim i ofertës sektoriale për vitin 2026. Financimi aktual për arsimin parashkollor, shërbimet sociale, kulturën dhe aktivitete komunitare është shumë më i ulët sesa kostot. Dyfishimi është i domosdoshëm për të garantuar standarde të barabarta shërbimi.

Së dyti: Krijimi i një fondi të veçantë për bashkitë rurale dhe malore. Ky fond duhet të marrë parasysh sfidat e territoreve malore, densitetin e ulët të popullsisë dhe kostot e larta të infrastrukturës pasi pa këtë instrument pabarazitë territoriale do të thellohen.

Qosja deklaroi se Kavaja përballet me mungesë financimi, edhe pse 70% e territorit është kodrinor dhe ka kosto të larta.

"Bashkia Kavajë përballet me mungesë të theksuar fondesh veçanërisht në infrastrukturën rurale, financimet janë të pamjaftueshme, edhe pse ato janë të rëndësishme për ekonomië dhe lëvizshmërinë e komuniteteve dhe turizmin.

Bashkia Kavajë ka një territor prej 200 km katror dhe një popullsi prej 85 mijë banorësh, 70% e territorit është kodrinor me investime të pakta ndër vite.

Njësitë Helmës dhe Luz i Vogël janë problematike. Krahasuar me bashkitë e tjera grantet kanë qenë dukshëm më të ulëta.

Me buxhetin aktual është e pamundur të mbulohen nevojat bazike të fshatrave", deklaroi kryebashkiaku./CNA