Njihej si krahu i djathtë i Emiljano Shullazit/ Kush ishte Gilmando Dani që u ekzekutua me plumba

11 Nëntor 2025, 15:42, Kronika CNA

Njihej si krahu i djathtë i Emiljano Shullazit/ Kush ishte Gilmando Dani

Gilmando Dani, i njohur si krahu i djathtë i Emiljano Shullazit, është ekzekutuar sot rreth orës 14:20, te rrethrrotullimi në afërsi të aeroportit.

Ai është ekzekutuar brenda automjetit me të cilin po lëvizte. Nga ky atentat ka mbetur i plagosur dhe shtetasi M.Sh., i cili ndodhet në gjendje të rëndë shëndetësore.

Po kush ishte Gilmando Dani?

Dani ishte një nga anëtarët e grupit të Emiljano Shullazit. Ai njihej si krahu i djathtë i tij.

Precedenti i parë zyrtar i Gilmando Danit daton më 11 shkurt 2006. Ai u vu në pranga pasi ishte shpallur në kërkim dhe ishte dënuar me 1 vit burg për akuzat për “mbajtje pa leje të armëve luftarake” dhe “kanosje në bashkëpunim”.

Gjatë arrestimit të tij policia gjithashtu sekuestroi armë dhe municione, pistoleta automatike tip Skorpions me silenciator, dy automatikë prodhim kroat e kallashnikov, radio komunikimi me distancë të afërt, radio përgjuese të valëve të strukturave të Policisë (në Tiranë dhe rrethe), fenelinë policie, dylbi speciale për shikim natën, dylbi të zakonshme si dhe maska, doreza dhe pajisje të tjera kamuflazhi.

Dani ka qenë i lidhur me grupin kriminal të Emiljano Shullazit, shpesh përshkruar si “krahu i djathtë” i tij në aktivitetet kriminale.

Akuzat dhe dënimet

Më 7 gusht të 2009 Gilmando Dani u kontrollua pasi vrasjes së katër efektivëve në Durrës nga Dritan Dajti.

Policia kishte dyshimë se Dani mund të kishte qenë në vendngjarje. Më tej u zbulua se Dani nuk kishte patur lidhje me masakrën në Durrës. Prokuroria për Krime të Rënda i bllokoi për disa ditë pasaportën, masë e cila u hoq pasi nuk u gjetën prova që ta implikonin.

Emri i Gilmando Danit është përmendur në operacione policore, thirrje për verifikim dhe procedura kontrolli, të bazuara në informacionet operative që lidhnin rrethin e tij shoqëror me individë të tjerë të hetuar për veprimtari kriminale.

Dani është përfshirë në hetime për “shtrëngim me anë të kanosjes për dhënie pasurie” në formën e grupit të strukturuar kriminal, ndaj biznesmenit Y.B.

Në nëntor të vitit 2018, Gjykata e Shkallës së Parë për Krime të Rënda në Tiranë e ka shpallur fajtor dhe e ka dënuar me 12 vite burg.

Dani ka qenë i vendosur nën regjimin “41-bis” (që përdorët për të burgosurit me rrezikshmëri të lartë) deri në transferimin e tij në burgun e përditshëm të sigurisë së zakonshme në Rrogozhinë në mars 2022.

Ai ka dhënë dëshmi në gjykatë që lidhen me takimin e tij me Y.B. dhe prezantimin e tij nga Shullazi.

Ndaj Danit është bërë atentat dhe dy herë më parë, por mbeti i plagosur. Ngjarjet ndodhën në vitet 2011 dhe në 2015.

Dani u lirua nga burgu në 6 tetor 2024 pasi kreu pjesën më të madhe të dënimit./ CNA