“Je në ofertë”/ Tensione mes Nuredin Dumanit dhe avokatit Dyzeni

17 Prill 2025, 13:14, Kronika CNA

“Je në ofertë”/ Tensione mes Nuredin Dumanit dhe avokatit

Në seancën gjyqësore të mbajtur sot për dosjen "Plumbi i Artë" ka pasur tensione.

Tensionet mes Nuredin Dumanit dhe avokatit të Besian Shixhës, Ilirjan Dyzeni, kanë çuar në ndërprejen e seancës.

Sipas asaj që raportohet në media, Nuredin Dumani i është drejtuar avokatit me fjalët “Je në ofertë”, gjë që ka shkaktuar reagimin e menjëhershëm të Dyzenit, i cili është shprehur se ky është një kërcënim i hapur ndaj tij.

Më tej avokati ka akuzuar prokurorin e SPAK-ut se ka heshtur pas një deklarate të tillë që sipas tij ishte kërcënim jete.

“Ky është presion, kërcënim i pastër dhe prokurori i SPAK-ut bën sehir. Sipas avokatëve me fjalët ‘je në ofertë’, Nuredin Dumani nënkupton që ka qenë në listë për t’u vrarë”.

Pas një pauze, seanca ka rinisur, sipas "Syri TV", avokati Dyzeni është shprehur:

Avokati Dyzeni: Ndoshta reagova gabim, i kërkoj gjykatës t'i tërheqë vëmendje prokurorisë, të jetë i vëmendshëm ndaj deklarimeve të bashkëpunëtorit. Jam avokat, nuk jemi luftëtarë. Unë s'e përballoj dot edhe nëse e thotë me shaka, ai është mbase rehat, ai është trim, unë s’jam trim, jam frikacak, ça t’i bëj atij. Kam vënë në dijeni edhe Dhomën e Avokatisë. Kryetari i Dhomës ishte në ambientet e gjykatës, e ndamë shqetësimin, s’mund të vijmë këtu dhe të përballemi me këtë situatë. Nuk vijojmë më kështu. Të merren masa të menjëhershme. Kjo është situatë e përsëritur.

Avokatët njëri pas tjetrit, kërkesë për shtyrje në shenjë sensibilizimi dhe kritika organit hetues për mosmarrje masash.

Avokatja Elda Zotaj: Në zyrën e prokurorisë i kam kërkuar prokurorisë të nisë procedim për Nuredin Dumanin për kanosje. Prokurori më tha “je në besën time, nuk të prek Nuredin Dumani”. Kjo është situatë e rëndë.

Prokurori Behar Dibra: Duhet të shikoni arsyet dhe shkaqet që çuan në atë deklaratë. Unë si pjesëmarrës s'e kam dëgjuar. Hapni audion, ai (Dumani) është i pandehur në këtë proces, thëniet e tij cilësohen dëshmi. Ç'e detyroi ta bënte atë pohim, kush e provokoi? Zonja avokate ke të drejtën të bësh që tani kallëzim ndaj meje, ik bëje aty ku duhet bërë. Merr regjistrimin dhe referoje ku të duash bashkë me emrin tim. I lutem gjykatës të vazhdojë gjykimin. Në të kundërt merrni masa, vendosni gjoba për cilindo avokat që bëhet pengesë për ndërprerje gjykimi.

Gentian Rumano, avokati i Henrik Hoxhajt që ishte personi që po pyeste në këtë fazë Dumanin kërkoi ndërprerjen e seances.

E si pasojë, GJKKO ka shtyrë seancën për të martën, më datë 22 prill.