61-vjeçarja u nda nga jeta 3 ditë më parë/ Familjarët akuza të forta ndaj mjekeve të spitalit të Korçës

17 Gusht 2024, 12:04, Kronika CNA

61-vjeçarja u nda nga jeta 3 ditë më parë/ Familjarët

Një ngjarje e rëndë ka ndodhur në spitalin rajonal të Korçës në datë 14 gusht, ku shtetasja T.D 61-vjeç ka humbur jetën.

Sipas informacioneve paraprake nga policia, shtetasja dyshohet se ka humbur jetën si pasojë e një arresti kardiak, por familjarët kanë ngritur një kallëzim se 61-vjeçarja ka humbur jetën për shkak të neglizhencës së dy mjekeve A.D dhe G.R.

Familjarët kanë ngritur akuza dhe tashmë dy mjeket janë nën hetim. Familjarët kanë folur për mediat duke akuzuar mjeket.

“Nëna jonë vdiq ditën e ditëlindjes, do i prisnim tortën e ditëlindjes dhe na vdiq nga duart e mjekëve, nuk kanë vrarë vetëm atë, na vranë edhe ne. Mos e pastë njeri fatin e nënës tonë, do e ndjekim këtë çështje deri në fund.

E ka marrë mamin vëllai në 10 pa dhjetë e ka çuar në urgjencën e spitalit, mami kishte shtrëngim te gjoksi dhe dhimbje në mes të shpatullave.E kanë dërguar atje i kanë matur tensionin dhe oksigjenin. I kanë bërë 1 qetësues dhe i kanë vënë një ilaç nën gjuhë.

Qëndroi 10 minuta shtrirë dhe i thanë ngrihu se erdhi tjetri,ulu te stolat te korridori i Urgjencës. U ul aty priti pak dhe i vajti tek dera doktoreshës i tha a do ma matni prap tensionin,ajo i tha ik se nuk ke asgjë ke ankth,stres.

Kur doli nga dera e spitalit ajo po ndihej më keq.Kur erdhi në shtëpi tha po ndihem akoma më keq prej ilaçeve,nuk ndihem mirë. E pamë që u bë më keq rreth orës 19 e 30 kemi marrë ambulancën,e pamë që ambulanca po ashtuuu…morëm makinën tonë dhe e çuam.

Sa arritëm te dera e spitalit mamaja ka vdekur,ajo kishte hemoragji nga hundët,nga goja si mund të thonë ata që ka vdekur për shkaqe të panjohura,natyrale kur ne e kemi paraqitur në 10 pa dhjetë në spital. Duhet të marrë masat shteti,mos e pastë fatin asnjë siç e pati mamaja ime nga doktorat.

Nuk vuante nga asgjë,ishte 61 vjeç,mbushi atë ditë që vdiq. Në spital nuk i bënë asgjë,kur kam hyrë në 19:30 në spital që mamaja ime sa hyri te dera e spitalit ishte e vdekur ata kanë marrë EKG-në tja bënin atëherë. Kam bërtitur me të madhe të hapin kamerat,të shikohen.Ku u gjet EKG-tani pse nuk ju bë kur ishte e gjallë. Nuk i kanë bërë asgjë,e bënë më keq”, ka thënë e bija e viktimës.

“Nëna rrinte me mua. E mora në 10 këtu dhe e çova në spital. E pyeti doktoresha çfarë ke? I tha mamaja më dhemb gjoksi dhe kurrizi. I matën tensionin dhe oksigjenin.I bënë gjilpërë, e ngritën u ul te stolat mamaja pas meje,u ngritëm prap i tha mamaja do më masni tensionin prap?Ik Ik i thanë nuk ke gjë një gjëndje ankthi ke. Duke ardhur rrugës për në shtëpi më tha mua, po më zë më shumë tani,por do më kalojë.

Erdhëm në shtëpi jo më tha po më zë më shumë.Erdhëm në shtëpi do prisnin tortën e ditëlindjes mbesat,ajo sa hyri brenda u këput.Morëm ambulancën, prit të vinte,pas 12 minuta na tha jemi në Bulgarec,megjithatë mora makinën time,me sakrificë,e çova në spital,te dera e spitalit atëherë morën mjetet për mamanë time.

Jo nuk bëhet ajo gjë,t’ja bënin shërbimet si vdiq.Përse e mbajtën në morg kur i kanë vënë ato diagnoza? Vdekje e menjëhershme???Çfarë janë këto që shkruajnë,për të mbuluar plerat?Unë çuditem,më coptuan.Çfarë ka nxjerë ekspertiza? Dua të drejtën e mamasë time,asnjë mos e ketë këtë fat të mamasë sime”, është shprehur djali.

“Turp,turp për këta doktorë që kemi dhe për këtë shtet që kemi. Erdhi mjekoligjori aty dhe shikoni çfarë ka shkruajtur,është tallur me ne. Na i kanë dhënë ditën e dytë në 3 pasdite,cop cop personin. E kishin çarë në kokë e kishin çarë kudo.

Turp i Zotit Turp mos e dinë se do shpëtojnë.Të vihet drejtësia në vend në mos ka edhe mënyra të tjera…Do luajmë gurin e fundit jetën e xhaxhovicës time nuk e mori Zoti e mori robi”, ka deklaruar nipi i viktimës./ CNA